Politike

VV në krah të Metës: Cakaj i rrezikshëm për interesin kombëtar

Vendimi i Presidentit Ilir Meta për të refuzuar emrin e Gent Cakajt si ministër të Jashtëm të Shqipërisë ka përçarë klasën politike dhe opinionin publik në Tiranë e Prishtinë. Pas opozitës shqiptare, refuzimi i kreut të shtetit është përshëndetur edhe nga opozita në Kosovë.

Lëvizja Vetëvendosje thotë se Shqipërisë nuk i duhen ministra të Jashtëm të Baton Haxhiut dhe Hashim Thaçit, që sipas saj kanë dalë hapur në mbështetje të idesë së coptimit të Kosovës. Në deklaratën e shpërndarë përmes rrjeteve sociale, Vetëvendosje njeh të shkuarën si anëtar të kësaj lëvizjeje të Gent Cakajt.

“Dëshirojmë ta sqarojmë opinionin e gjerë publik se Cakaj ka qenë i anëtarësuar formalisht në Lëvizjen Vetëvendosje para vitit 2011. Ne nuk e dimë datën e saktë të largimit të tij nga Lëvizja, sepse ai nuk i ka dhënë asnjë shpjegim organizatës”, thuhet aty.

Republikës së Shqipërisë nuk i duhen ministra të Baton Haxhiut dhe Hashim Thaçit Është për t’u mbështetur vendimi i…

Gepostet von Lëvizja VETËVENDOSJE! am Donnerstag, 10. Januar 2019

Më pas analizohen të gjitha deklaratat publike të të propozuarit nga Edi Rama për ministër të Jashtëm të dhëna kryesisht në emisionin e Baton Haxhiut në Klan Kosova. Për Haxhiun hedh akuza të forta, madje e cilëson edhe si të përfshirë në përçarjen e Vetëvendosjes vitin e kaluar.

Gent Cakaj gjate nje interviste ne emisionin Zona e Debatit te Baton Haxhiut

“Në emisionin e datës 3 janar 2018, në Klan Kosova, drejtori Baton Haxhiu tregon se si e ka njohur Gent Cakajn që prej moshës 15 vjeçare, dhe se si e ka ndjekur më tej zhvillimin e tij. Kujtojmë se Haxhiu ka qenë bashkëpunëtor i UDB-së para dhe gjatë lufte, vartës i krerëve të saj, Jovica Stanishiq dhe Zoran Stijoviq dhe i përfshirë direkt në planin për largimin e disa deputetetëve që u shkëputën nga Lëvizja Vetëvendosje vitin e kaluar, pasi morën padrejtësisht mandatet e fituara në emër të Lëvizjes”, vijon deklarata.

Më tej, Vetëvendosje akuzon gazetarin e Klan Kosovës se ka kërcënuar Presidentin Ilir Meta, “i shqetësuar për fatin e investimit të tij shumëvjeçar”.

“Në datën 11 janar 2018, në intervistën e dytë të Cakajt në Klan Kosova me Baton Haxhiun, sqarohen disa qëndrime edhe më të rrezikshme. Aty ai mbron me të gjitha kapacitetet që ka idenë e Thaçit për copëtimin e Kosovës. Ai shkon aq larg sa merret edhe me ndarjen e aseteve të Trepçës, por përdor edhe shprehje si “Veriu i Mitrovicës, nëse mbetet në Kosovë …”. Ai lë të nënkuptohet se nuk është kundër copëtimit të veriut dhe instalimit të një forme të “Zajednicës” në pjesët e tjerat të vendit”, thotë Vetëvendosje.

Kjo lëvizje thotë se vlerëson disa politika e deklarata të Edi Ramës, përfshirë deklaratën e bërë në Beograd në konferencën me Vuçiçin, por deklaron se emërimi i Gent Cakajt ka qenë krejt i pavend.

Rastësi apo jo, po rrëzimi i Gent Cakajt nga Presidenti Ilir Meta dhe më pas deklarata mbështetëse e Vetëvendosjes që pasoi këtë vendim mbërritën njëra pas tjetër pas takimit mes Ilir Metës dhe Albin Kurtit në Presidencën shqiptare.

Kënaqësi e veçantë të prisja sot në mbrëmje në një takim të veçantë Liderin e Vetëvendosjes, z.Albin Kurti. Forcimi i…

Gepostet von Ilir Meta am Dienstag, 8. Januar 2019

Përmes rrjeteve sociale Presidenti Ilir Meta thotë se temë e diskutimit ka qenë forcimi i bashkëpunimit mes dy vendeve tona dhe rëndësinë e dialogut mes Kosovës dhe Serbisë.

“Në këtë drejtim theksova rëndësinë e dialogut Kosovë-Serbi që t’i shërbejë të ardhmes europiane të të dy vendeve dhe konsolidimit të bashkëjetesës e paqes në rajon. Vlerësova se Vetëvendosja si forcë kryesore politike duhet të luajë rol të rëndësishëm për forcimin e shtetit të Kosovës dhe arritjen e konsensusit të plotë për një dialog të suksesshëm dhe të qëndrueshëm me Serbinë”, deklaron Meta.

Më Shumë