Një person ka mbetur i vrarë me armë zjarri këtë të hënë në Fier.
Ngjarja e rëndë ka ndodhur në rrethrrotullimin e fshatit Sheq.
Policia e Fierit në njoftimin e saj zyrtar thotë se viktima Shkëlzen Kastrati ndodhej në automjetin e tij tip “Benz”, kur u qëllua për vdekje.
“Sot rreth orës 10:30, në vendin e quajtur ‘Ura e Sheqit’, një shtetas i paidentifikuar, ka vrarë me armë zjarri shtetasin Sh. K., i cili ka qenë në automjetin tip ‘Benz’”, thuhet në njoftimin e policisë.
Ndër të tjera, policia thotë se autori i paindentifikuar ende është larguar me automjetin e tij, i cili është gjetur i djegur.
“Autori është larguar nga vendngjarja me një automjet tip ‘Range Rover’, i cili u gjet nga shërbimet i djegur te vendi i quajtur ‘Mbikalimi i Baltzës’”, vijon më tej policia.
Trupi i personit në fjalë mësohet se është ende në makinë, ndërsa policia ndodhet në vendin e ngjarjes.
Dyshohet se autori ka qëlluar nga një distancë e afërt, dhe më pas është larguar nga vendi i ngjarjes me automjetin ‘Range Rover’.
Ndërkohë që automjeti tip ‘Benz’ ku ishte viktima, ka humbur kontrollin dhe është përplasur me një tjetër makinë.
Shkëlzen Kastrati është baba i katër fëmijëve, ndërsa në pronësi kishte një lokal-bilardo në Fier.
Kastrati është goditur nga një distancë e afërt, ndërsa dyshohet se autorët kanë përdorur një armë tip ‘Scorpion’ me silenciator.
Ndërkohë që viktimën e kanë kapur dy plumba nga ana e pasagjerit, një në krah dhe tjetri në ballë.
Ndërkohë, vëllait të Shkelzen Kastratit, Kelment Kastrati, iu bë një atentat në janar të vitit 2016 në vendin e njohur si Mulliri i Artë.
Në këtë atentat mbeti i vrarë Granit Kasa, ndërsa për ngjarjen u akuzua Ermal Binjaku.
Mësohet se konfliktet mes fiseve kanë nisur në vitin 1994, kur është vrarë kushëriri i parë, Klement Kastrati.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.