Shoqja e ngushtë e Marvi Mihalit, i riu që humbi jetën gjatë një sherri me thikë verën e kaluar, ka dëshmuar sot në Gjykatën e Tiranës.
Dëshmitarja Grejsi Stermasi, ka treguar se para ngjarjes, ajo së bashku me Marvin dhe disa miq të tjerë kanë qenë te sheshi “Nënë Tereza”, ndërsa e ka marrë Armendi në telefon dhe i ka thënë që të shkonte me të.
Sipas saj, i riu i ka thënë jo, por pas disa insistimeve të tij, ka shkuar. Në spital, tha dëshmitarja, Armendi i ka pohuar se Marvin e ka vrarë Dejvi Bitraj.
Dëshmi ka dhënë dhe Besim Sokolaj, i cili ka qenë prezent kur ka ndodhur krimi, pasi punonte roje në një kazino. Sokolaj tha se nuk e kishte parë momentin e vrasjes së Marvit, por vetëm një përleshje mes disa të rinjve. Sokolaj sqaroi se nuk kishte ndërhyrë, pasi nuk donte të rrezikonte vendin e punës.
Kjo dëshmi solli dhe reagimin e prindërve të Marvi Mihalit, të cilët thanë se ndërhyrja e rojes mund t’i kishte shpëtuar jetën djalit të tyre. Në seancën e ardhshme te datës 14 Janar do të japin dëshmitë e tyre dy personat e arrestuar Devi dhe Eugen Bitraj.
Ndërsa në kërkim vazhdojnë të jenë Marsel dhe Gridens Alla. Krimi tronditës ndodhi në korrik të vitit 2017, kur Marvi Mihali u qëllua me thikë për vdekje, pas sherrit për një karikues telefoni.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.