Një shpërthim i fuqishëm ka tronditur qytetin e Vlorës mbrëmjen e sotmee. Ngjarja ka ndodhur mbrëmjen e sotme në lagjen “Çole”, në katin e dytë të një pallati dhe dyshohet se është shkaktuar nga vendosja e një sasie lënde plasëse, tritol.
Në banesën ku ka ndodhur shpërthimi, jetonte bashkëshortja e të ndjerit, Hyqmet Nexhipi, i cili u ekzekutua dy vite më parë në Vlorë.
Policia e Vlorës ka sqaruar për mediat se bashkëshortja e të ndjerit është vendosur në këtë banesë disa javë më parë dhese jeton me qira. Forca të shumta policore mbërritën në vendngjarje dhe kanë nisur hetimet.
Por kush është Hyqmet Nexhipi i ekzekutuar më pak se tre vjet më parë? Në Vlorë ai njihej si pronari i peshkarexhës “Drita” dhe është ekzekutuar me breshëri automatiku mëngjesin e 23 janarit 2016 në vendin e quajtur “Karburant Vola” në rrugën “Transballkanike”.
52-vjeçari banues në Vlorë drejtonte automjetin tip “Honda”, me targë JBM3221, brenda së cilës janë gjendur 2 gëzhoja automatiku, model 56.
Viktima njihej edhe me emrin Pëllumb Nexhipi dhe ishte i divorcuar nga bashkëshortja, së cilës i vendosën sot tritolin në banesë. Policia asokohe dyshoi se ai u vra për larje hesapesh, pasi rezulton me precedentë për shfrytëzim prostitucioni në Itali dhe kishte dalë nga burgu në 2013.
Asokohe policia e Vlorës, dy ditë pas vrasjes së Hyqmet Nexhipit, arrestoi djalin e tij 24-vjeçar Olsi Nexhipi, i cili jetonte me të ëmën, pasi në shtëpi iu gjet drogë dhe armë.
Ndërkohë vrasja e 52-vjeçarit u zbardh nga Policia e Vlorës më 1 qershor 2016 dhe në pranga ra Flobenc Gega, 34 vjeç, lindur në Shkodër, banues në Tiranë, ndërkohë që u shpall në kërkim Deison Nallbani, 30 vjeç, banues në Vlorë.
“Nga kryerja e veprimeve hetimore e procedurale, Deison Nallbani rezulton të jetë autori i vrasjes së 53-vjeçarit Hyqmet Nexhipi. Ngjarja e rëndë ka ndodhur mëngjesin e datës 23 janar 2016, në lagjen “Pavarësia”, - njoftonte asokohe policia. - Personat e lartpërmendur e kanë ekzekutuar Nexhpin me armë zjarri “automatik”. Arrestimi i shtetasit Flobenc Gega, u bë, pasi gjatë hetimeve të kryera, ky shtetas është identifikuar si personi që ka siguruar kushtet dhe mjetet për kryerjen e kësaj vrasjeje”.
Flobenc Gega, person me precedent penal, ishte shpallur në kërkim ndërkombëtar nga autoritetet Gjermane për “Grabitje” dhe “Plagosje”. Gjithashtu, i dënuar nga autoritetet Belge dhe Italiane për “Pjesëmarrje në organizatat kriminale me aktivitet në fushën e narkotikëve, prostitucionit, vrasjeve dhe për kryerjen e 180 grabitjeve me dhunë dhe armë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.