.png)
Qindra protestues e policë janë përplasur në Shangai të dielën(27 nëntor) në mbrëmje, ndërsa vazhdojnë protestat mbi kufizimet e ashpra të Kinës.
Vala e mosbindjes civile nuk është parë në Kinë që nga ardhja në pushtet e presidentit Xi Jinping një dekadë më parë, ndërsa vazhdon të rritet zhgënjimi ndaj politikës së tolerancës zero ndaj Covid-19, gati tre vite pas fillimit të pandemisë.
Masat kufizuese kundër Covid-19 ndikuan rëndë ekonominë e dytë më të madhe të botës. Protestuesit gjithashtu protestuan në qytetet e Wuhan dhe Chengdu të dielën, ndërsa studentët në konviktet e shumta universitare në Kinë organizuan protesta gjatë fundjavës.
Në orët e para të së hënës në Pekin, dy grupe protestuesish me një total prej të paktën 1000 njerëzish u mblodhën përgjatë kryeqytetit kinez pranë lumit Liangma, duke refuzuar të largohen.
“Nuk duam maska, duam liri. Nuk duam teste të Covid-19, duam liri”, thërriste njëri nga grupet e protestuesve.
Që nga e premtja protestat po mbahen në të gjithë vendin. Protestat në rrugë janë jashtëzakonisht të rralla në Kinë. Në Shangai demonstruesit kërkuan dorëheqjen e udhëheqësit kinez Xi Jinping.
Ndonëse rastet me COVID në Kinë janë më të ulëta në krahasim me vendet e tjera të botës, në ditët e fundit ato janë rritur në nivele rekord. Autoritetet kineze njoftuan të dielën se një ditë më parë janë regjistruar rreth 40,000 raste të reja me Covid-19.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
