.png)
Gazeta Si - Shqiptari Arjanit Rizaj u ekzekutua me tetë plumba brenda makinës së tij ndërsa po priste bashkëshorten të dilte nga një spital në Guajakili të Ekuadorit.
Mediat vendase kanë publikuar foton e 53-vjeçarit, i cili është marrë në krahë nga qytetarët për t’u dërguar në urgjencë.
Por mjekët nuk i kanë hapur dyert, ndaj është dashur të dërgohet në një klinikë private, ku ka ndërruar jetë rreth 40 minuta pas shtrimit.
Viktima ndodhej brenda makinës me targë GSM-2390 kur u sulmua në Guajakili nga dy persona që mbërritën në vendngjarje me një motoçikletë.
Bashkëshortja e 53-vjeçarit tha për policinë se kishin mbërritur pak minuta para atentatit në urgjencë për të vizituar një të afërm që kishin shtruar atje.
Mes të tjerash, mësohet se Rizaj kishte arritur të merrte dokumente ekuadoriane. Aktualisht vijojnë hetimet për zbardhjen e ngjarjes.
Mbrëmë u publikuan pamjet ku shihej shqiptari i shtrirë në tokë dhe i plagosur, ndërsa gruaja dhe të afërm i qëndrojnë në kokë, ndërsa disa të tjerë tentojnë që të hapin derën e spitalit për ta futur brenda.
Ata dëgjohen duke bërtitur “është gjallë, hapni derën”, në mënyrë që të ndërhyjnë mjekët për ta ndihmuar, por dera nuk hapet deri në momentin që vjen një efektiv policie.
Në parkingun e spitalit “Luis Vernaza”, agjentët e kriminalistikës gjetën tetë gëzhoja 9 mm dhe një plumb të deformuar.
Në qershor 2022, në të njëjtin parking, policia arrestoi 18 persona, disa të armatosur, të lidhur me një organizatë kriminale.
Ajo që bie në sy, është se ekzekutimi ka ndodhur në të njëjtën ditë me arrestimin e Dritan Rexhepit në Stamboll të Turqisë.
Ky i fundit ishte baroni i kokainës që vinte nga Amerika Latine drejt Europës dhe qëndroi shumë kohë në Ekuador deri sa u arrestua në vitin 2014.
Nuk dihet nëse ngjarjet kanë me njëra-tjetërn, por dyshimet janë se Arjanit Rizaj ka qenë pjesë e klaneve të drogës në Ekuador dhe përplasjet mes vetë bandave të shqiptarëve kanë sjellë ekzekutimin e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
