.png)
Arbnor Muçolli është një nga futbollistët më të talentuar në ekipin e Shqipërisë U-21, ku në ndeshjen e fundit ka qenë i papërmbajtshëm përpara portës. Talenti kuqezi, aktivizohet në Danimarkë me skuadrën e Vejle Boldklub, ekip në të cilin luan edhe mesfushori Ylber Ramadani.
Në takimin e fundit, Vejle ka arritur të fitojë me rezultatin 4-1 në shtëpi teksa ka shkëlqyer edhe talenti Muçolli. Mesfushori shqiptar ka arritur të realizojë tripletë, ku serinë e golave do ta hape në minutën e 13, duke vendosur baraspeshën, ndërsa në minutën e 30-të do të bënte të mundur edhe përmbysjen e shifrave të takimit.
Nuk është mjaftuar vetëm me kaq, pasi në minutën e 83-të, 20-vjeçari ka përfituar nga një gabim i portierit duke shënuar edhe golin e tretë personal, duke vulosur edhe rezultatin përfundimtar të takimit. Me tripletën e realizuar , Muçolli shkon në kuotën e 7 golave në kampionat dhe 6 asist. Muçolli është pjesë e Shpresave të Shqipërisë, ndërsa më herët ka luajtur me të rinjtë e Danimarkës dhe është formuar në akademinë e Vejles.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
