.png)
Partia Demokratike publikoi sot një video nga një Qendër Votimi në Kavajë, ku sipas saj, komisionieri mbush kutitë dhe plotëson fletën me numrin e kartës së identitetit të emigrantëve. Deputeti i PD-së, Oerd Bylykbashi deklaroi se mbushja e kutive u realizua pasi u deklaruar nga KQZ se në ora 11:00 pjesëmarrja në votimeve ishte në 12 për qind, ndërkohë vetë shifrat e Komisionit Qendror të Zgjedhjeve tregonin vetëm 6 për qind.
“Sot ju paraqesim provën filmike të kësaj skeme kriminale të manipulimit të rezultatit zgjedhor. Mekanizmi është shumë i pastër: është mbushja e kutive të votimit me vota nga komisionerët. Siç e shihni, kjo është qendra e votimit që nuk ka asnjë garanci, është qendër e hapur. Mund ta shihni ka edhe badge-n e anëtarit të Komisionit, plotësojnë fletën e votimit komisionerët dhe mbushin kutitë më pas ulet tek tryeza e komisionit. Ky komisioner dhe të gjithë këta komisionerë do të mbajnë përgjegjësi penale për veprën penale të mbushjes së kutive”, tha Bylykbashi.
Sipas tij, komisionerët ndjekin këtë procedurë, ku identifikojnë zgjedhësit pasi marrin informacionin telefonikisht; marrin të dhënat dhe kartën e identitetit të zgjedhësve që nuk vijnë dot të votojnë, përfshi edhe emigrantë, dhe këtë gjë e bëjnë në mënyrë individuale, në mënyrë që të kontrollojnë fluksin e votimit, por siç e shihni, aty nuk ka asnjë votues të paraqitur.
“Komisioneri tjetër plotëson fletën e votimit, e mbush aty ku duhet. Janë të gjithë anëtarë të PS, aty gjendet edhe komisioneri që në mënyrë false i vendosur nga shoqëria civile. Merret fleta e votimit, mbushet kutia dhe siç tregohet nga videoja jemi herët në procesin e votimit pasi shihni se sa pak ka fletë votimi në kuti dhe më pas pasi kryen detyrën komisioneri me badge-n e KQZ pasi kryen veprën penale “krimi zgjedhor” ulet në komision”, shpjegon Bylykbashi.
Për opozitën ky është një mekanizëm manipulimi i pastër për mbushjen e kutive me vota nga vetë komisionerët, vetëm për rritur numrin e votuesve në zgjedhjet e 30 qershorit. Për opozitën 85% e shqiptarëve bojkotuan zgjedhjet dhe se vetëm 15% e votuan Ramën, përfshirë administratën e dhjetëra mijëra punonjës të administratës që ishin të trysnuar dhe të dhunuar psikologjik, duke i kërcënuar me vendin e punës.
“Kjo është skema me të cilën Edi Rama ka mbushur kutitë. Sot Edi Rama ka urdhëruar dhe ia ka ekzekutuar KQZ që në kutitë të ketë vota, sa i duhen Edi Ramës. Por më 30 qershor ka pasur vetëm 15 për qind votues, ndërsa 85 për qind e zgjedhësve e refuzuan 30 qershorin e Edi Ramës.
Kjo skemë kriminale është shtrirë në të gjithë Shqipërinë. Provat janë mbledhur, po dokumentohen përditë e më tepër dhe kallëzimet penale do të bëhen për të gjithë këta persona që janë përgjegjës duke filluar nga KQZ dhe në të gjithë administratën. Sigurisht që është detyrim i Prokurorisë që të fillojë ndjekjen penale, por siç e dimë deri më sot nuk ka asnjë veprim dhe siç e dimë mbi dosjen “339” dhe “184” nuk ka bërë asnjë veprim. Me këtë skemë krimesh zgjedhore këto zgjedhje nuk kanë asnjë vlerë, janë vetëm votime moniste, ODIHR e ka thënë qartë se zgjedhësit atë ditë nuk patën mundësi për të zgjedhur dhe për rrjedhojë ato nuk janë zgjedhje”, theksoi Bylykbashi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
