.png)
Mungesa e tifozëve dhe e golave e ka bërë derbin Tirana-Partizani të duket një ndeshje e zakonshme kampionati. Atmosfera ishte e zbehtë, ndërsa gjendja e fushës sikur e prishte edhe bukurinë e lojës.
Kryendeshja e javës së 6-të të Superiores është mbyllur me rrjeta të paprekura, pavarësisht disa rasteve sporadike që krijuan dy skuadrat.
Më afër fitores ishte Partizani, që iu afrua golit me Jurgen Bardhin, por sulmuesi i kuq u ndal nga portieri Bekaj. Portieri kosovar i bardhebluve ishte nga më të mirët në fuishë, kurse kolegu i tij, Alban Hoxha, rrezikoi në dy raste. Tirana pretendoi për në dy raste për penallti në fund të ndeshjes, kur Muçi u rrëzua në zonë, por për kryesorin Juxhin Xhaja nuk asnjë ishte 11-metërsh.
Trajneri Daja i kishte besuar formacionit fitues të ndeshjeve të fundit, ndërsa Dede këtë herë uli në stol Halilin dhe aktivizoi titullar Tolin. Është rikthyer në formacion edhe Vangjeli, duke bërë që Hoxhallari të spostohet në të majtë, ndërsa Ismailgeci luajti në mesfushë.
Barazimi 0-0 është një rezultat që në këtë situatë i shkon më tepër për shtat Partizanit, që shkëputet një pikë nga Vllaznia në krye të klasifikimit (11 pikë), por shkodranët nuk kanë zhvilluar ndeshjen e radhës. Me Deden në krye, Tirana mbyll ndeshjen e katërt pa fitore dhe qëndron poshtë në renditrje, me 5 pikë. Java e 6-të vazhdon sot me ndeshjet Kukësi-Apolonia, Skënderbeu-Laçi, Vllaznia-Bylis dhe Teuta-Kastrioti.
Tirana-Partizani 0-0
TIRANA: Bekaj, Toshevski, Najdovksi, Vangjeli, Hoxhallari, Toli, Batha, Ismajlgeci, Danso, Torasa, Muçi. Trajner: N.Dede
PARTIZANI: Hoxha, Idrizaj, Bitri, Belica, Hakaj, Kote, Broja, Bardhi, Solomon, Mala, Kardozo. Trajner: I.Daja
Arbitër: J.Xhaja
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
