.png)
Gazeta Si - Oficerët e Policisë Gjyqësore kanë shkuar mëngjesin e kësaj të premteje në banesën e ish-kryeministrit Sali Berisha për inspektimin e zbatimit të masës së sigurisë "arrest shtëpie" të vendosur ndaj tij nga Gjykata e Posaçme.
Shefi i Sektorit të Krimit Ekonomik në Policinë e Tiranës është pjesë e kontrollit që bëhet si pjesë e procedurës, pasi Gjykata e Posaçme Antikorrupsion caktoi në 30 dhjetor "arrest shtëpie" me mbikëqyrje policore për ish-kryeministrin.
Sali Berisha prej datës 30 dhjetor 2023 ndodhet në “arrest shtëpie”, në hetim për aferën e privatizimit të klubit sportiv "Partizani", por herë pas herë ka kontaktuar nga ballkoni i banesës së tij me mbështetësit demokratë.
E djeshmja ishte e treta natë që Berisha komunikoi me protestuesit poshtë ballkonit të tij, edhe pse vendimi i Gjykatës së Posaçme për masën e sigurisë “arrest në shtëpi” parashikon ndalimin e komunikimit me çdo person që nuk jeton në të njëjtën strehë me të.
Ministri i Brendshëm, Taulant Balla i cilësoi daljet dhe fjalimet e Berishës në ballkon si të papranueshme dhe kërkoi nga Policia e Shtetit që ta trajtojë ish-kryeministrin si çdo qytetar tjetër i Republikës së Shqipërisë.
Sipas vendimit të gjyqtares Irena Gjoka, ish-kryeministri Berisha urdhërohet të mos largohet nga banesa ku do të jetë me mbikëqyrje periodike policore dhe nuk duhet të kontaktojë me persona të tjerë përveç anëtarëve të familjes që gjenden në të njëjtën banesë me të.
Avokati i Berishës e cilësoi ndalimin e komunikimit si privim të lirisë për një deputet dhe paralajmëroi apelimin e masë.
Sipas procedurave, mbikëqyrja policore parashikon shërbime të rregullta pranë banesës së Berishës për të ndjekur respektimin e kësaj mase nga ana e tij.
Nën hetim për këtë dosje është dhe dhëndri i tij Jamarbër Malltezi, i cili ndodhet në masë sigurie arrest shtëpie.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
