Kukësi ka bërë detyrën në ndeshjen ndaj Apolonisë, duke marrë tri pikët falë një foli të sulmuesit Eze në pjesën e dytë. Është kthyer në stol trajneri Skënder Gega, i cili u kurua në Turqi pas infektimit nga Covid-19.
Ishte fitorja e tretë radhazi për skuadrën verilindore, që i ngjitet në kuotën e 10 pikëve dhe i afrohet edhe më shumë kreut, tashmë e ka vetëm 3 pikë larg. Apolonia nga ana e saj ka bërë një ndeshje të mire në Elbasan, por ka vuajtur mungesën e përvojës dhe ka pasur edhe ndonjë vërejtje për gjykimin.
Vendin e tretë në Superiore e mban Kastrioti i ardhur nga Kategoria e Parë. Skuadra krutane vazhdon të surprizojë dhe sot ka marrë pikë edhe në Durrës, ku ka barazuar 1-1 në stadiumin “Niko Dovana” ndaj Teutës. Kastrioti nuk ka pësuar asnjë humbje në 6 javë dhe ka 10 pikë, ashtu si dhe Kukësi. Teuta vazhdon të vuajë krizën e rezultateve dhe nuk është çudi të ketë ndonjë lëvizje në stolin e saj.
Pas javës së 6-të të kampionatit, kryeson Vllaznia me 13 pikë, e ndjekur nga Partizani me 11 pikë e më pas Kastrioti dhe Kukësi me nga 10.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.