.png)
Skuadra e Skënderbeut vazhdon formën e mirë, pasi ka koleksionuar fitoren e pestë radhazi teksa në Tiranë mposhtën me rezultatin 2-1 Partizanin, e vlefshme për javën e 27-të në Kategorinë Superiore. Demat e Kuq u dorëzuan pa shumë kushte ndaj korçarëve, ndërsa edhe trajneri Sormani duket se nuk po jep efekt për të nxjerrë skuadrën nga kriza, teksa është ndeshja e katërt pa njohur triumf. Ndërkohë, sa i përket ndeshjes, Skënderbeu arriti të zhbllokonte rezultatin në minutën e 43-të, ku pas goditjes nga këndi, topi harkohet te Gripshi i cili shënon me gjë gjuajtje spektakolare nga jashtë zonës duke mposhtur Hoxhën.
Vetëm një minutë më vonë, Dita shënon golin e dytë. Pas një krosimi nga e djathta, mesfushori i skuadrës korçare është treguar i saktë brenda zonës duke e dërguar topin në cepin e portës. Sakaq, në fraksionin e dytë Partizani u mundua të ndryshonte mentalitet dhe hodhi më shumë vështrimin nga porta kundërshtare. Madje ia dolën edhe të rihapnin ndeshjen. Pas një aksioni nga e majta, topi shkon në anën tjetër te Ferati i cili gjuan dhe dërgon sferën poshtë traversës duke rihapur ndeshjen.
Megjithë përpjekjet rezultati nuk ndryshoi deri në fund. Pas kësaj ndeshje, Partizani mbetet në vendin e 7 pranë fundit të tabelës teksa kanë grumbulluar vetëm 38 pikë. Sakaq, në krahun tjetër, Skënderbeu falë këtij rezultati ngjitet në vendin e tretë me 44 pikë.
Partizani-Skënderbeu 1-2
Golat: 85′ Ferati / 43′ Gripshi, 44′ Dita
Partizani: Hoxha, Belica, Boldor, Bitri, Trashi, Telushi, Mala (84′ Ferati), Kote (59′ Broja), Çinari (67′ Braun), Cara (59′ Llanaj), Bardhi.
Trajner: A. Sormani
Skënderbeu: Koliçi, Jashanica, Pollozhani, Pëllumbi, Imami, Daja (76′ Mara), Elezi, Dita, Gripshi, Bregu, Krasniqi (89′ Mensah).
Trajner: I. Daja
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
