.png)
Një Inter në formë të mirë ka bërë detyrën në Firence dhe të paktën për dy netë do të jetë në krye të Serisë A. Skuadra e Kontes ka fituar 0-2 në fushën e Fiorentinës, me gola të Barelës dhe Perisiçit. Interi është ngjitur në kuotën e 47 pikëve, 1 më shumë se Milani, që të dielën do të luajë ndeshjen e radhës në shtëpi me Krotonen. Tashmë zikaltrit mund të përqendrohen te ndeshja e kthimit në Kupën e Italisë kundër Juventusit.
Perisiç fitoi balotazhin me Jang për krahun e majtë, kurse Sançez atë me Lautaro Martinez për të qenë në krah të Lukakut nga minuta e parë. Te Fiorentina mungonin për shkak kartonësh Milenkoviç dhe Kastrovili, si dhe Frenk Riberi për shkak dëmtimi.
Gjatë pjesës së parë për Interin ka bërë gjithçka Barela, duke depërtuar në zonën e Fiorentinës disa herë, ndërsa goli do të vinte në minutën e 31-të. Mesfushori italian gjuajti fort me të djathtën nga distanca dhe tundi rrjetën. Provoi të reagonte Fiorentina, por Handanoviç ishte i gatshëm në çdo moment.
Në pjesën e dytë Vidal la fushën për shkak dëmtimi. Edhe Prandeli ndryshoi mesfushën, por Interi i dha goditjen e dytë shumë shpejt. Hakimi, sërish përcaktues, fluturoi në të djathtë, duke djegur Igorin dhe i dhuroi Perisiçit topin e golit të dytë. Më pas Interi e kontrolloi mirë lojën, Konte bëri ndërrimet e tjera dhe të tijtë iu afruan golit të tretë, por pa e gjetur atë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
