U takoi grupeve F dhe G të ngrinin siparin e Championsit, e xhiros së parë të ndeshjeve në grup të kompeticionit më të rëndësishëm europian në rang klubesh. Juventusi ka fituar 0-2 në transfertën e Kievit, duke i bërë një nisje të mbarë aventurës europiane për këtë sezon.
Alvaro Morata është njeriu i momentit te kampionët e Italisë. Ai shënoi të dy golat në fushën e Dinamos së Kievos, në pjesën e dytë. Spanjolli zhbllokoi shifrat, duke dërguar në rrjetë një top të grushtuar nga portieri ukrainas, pas gjuajtjes së Kulusevskit. Në rastin e golit të dytë ai u shkëput bukur dhe devijoi saktë me kokë një kros nga e djathta.
Trajneri Andrea Pirlo kishte bërë ndryshime në formacion, në krahasim me ndeshjet e kampionatit. Ai aktivizoi lojtarët më me përvojë që ka në skuadër. Dibala e nisi sërish nga stoli, por u hodh në fushë në pjesën e dytë, kurse Kristiano Ronaldo është jashtë skuadrës për shkak të karantinës. Juventusi shijon tri pikët e para në grup.
Ndeshja tjetër e mbyllur tashmë është ajo e Grupit F mes Zenitit dhe Bryzhit, ku ka ardhur edhe një rezultat surprizë. Skuadra belge ka fituar në këtë transfertë të vështirë, me rezultatin 1-2.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.