.png)
Armando Broja ka gjetur kurajë për ta kaluar momentin e vështirë që përjetoi pas atij rasti flagrant të humbur në ndeshjen ndaj Groningenit, që i kushtoi pikë të humbura skuadrës së tij. Sulmuesi ishte sot protagonist në fitoren 2-0 ndaj Sitardit. Ai shënoi golin e dytë për Viteshen dhe të pestin në këtë kampionat. Shtatlarti devijoi drejt rrjetës një top të krosuar nga një goditje dënimi.
Broja e nisi ndeshjen titullar dhe realizoi në minutën e 84-t, dy minuta para se të zëvendësohej, duke marrë përqafimet e gjithë skuadrës. Viteshe është ngjitur në kuotën e 25 pikë me këtë fitore dhe ka përpara në renditje vetëm Ajaksin, me 27 pikë. Në 10 ndeshje të luajtura, Viteshe regjistron 8 fitore, 1 barazim dhe 1 humbje, ndaj dhe mund të konsiderohet anti-Ajaksi në kampionat.
Futbollisti kuqezi është bashkuar me skuadrën holandeze në merkaton e verës, duke kaluar në formë huazimi nga Çelsi. Ai ka qenë protagonist me lojën dhe golat e tij. Ai rast me portë bosh i humbur ndaj Groningenit e vuri në qendër të kritikave, por sulmuesi i ri shqiptar ka ditur ta përballojë momentin e vështirë dhe është përgjigjur me golin e radhës. Broja nuk luajti në ndeshjet e fundit me Kombëtaren për shkak dëmtimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
