.png)
Gazeta Si – Merkatoja e dimrit është shumë më e vështirë se ajo e verës, alternativat janë të pakta dhe shpesh edhe ‘baste’ për klubet shqiptare. Një i tillë duket edhe rasti i Dinamos me Kilian Çunin, vëllanë e sulmuesit të Kombëtares, Marvin Çuni.
Ai vjen nga Gjermania, por nga kategoritë e ulëta dhe konkretisht nga ekipi Eintraht Karlsfeld. Luan në mbrojtje, ndryshe nga vëllai i tij që luan në sulm. Kilian Çuni ka firmosur një kontratë për 18 muaj me Dinamon dhe është prezantuar te klubi kryeqytetas.
Edhe pse eksperiencën e deritanishme ky lojtar e ka pasur në futbollin inferior gjerman, te Dinamo i besojnë punës profesionale që në Gjermani bëhet edhe në nivele të tilla. Tani është në dorën e 24-vjeçarit që të bindë stafin e Dinamos dhe të fitojë vendin në formacion.
Dinamo është një nga klubet më aktive në merkaton e janarit. Afrimi i Çunit është i katërti për kryeqytetasit, të cilët më parë kanë firmosur me Jorgo Meksin, Mori Bamban dhe Stivian Jankun.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
