.png)
Gazeta Si – Buzëqesh Uzuni, buzëqesh edhe trajneri Silvinjo, i cili ndodhet në Spanjë këtë fundjavë për të ndjekur nga afër lojtarët e Kombëtares. Dhe sot trajneri brazilian ka marrë një mesazh të qartë nga sulmuesi beratas.
Uzuni ka lënë pas dëmtimin që kishte pësuar javën e kaluar, duke ngritur alarmin në kampin kuqezi. Ai u fut në fushë si zëvendësues në pjesën e dytë dhe shënoi një gol të rëndësishëm për skuadrën e tij, Granadën, duke i dhënë asaj një pikë. Ishte goli i 3-të në kampionat për beratasin.
Futbollisti shqiptar barazoi shifrat në 3-3 pak pasi hyri në fushë. Uzuni shfrytëzoi në mënyrën më të mirë një sulm të shpejtë të Granadës dhe me një gjuajtje të saktë nga jashtë zonës e dërgoi topin në rrjetën kundërshtare.
Ndeshja e sotme me Almerian nisi keq për Granadën, pasi në fund të pjesës së parë humbiste 3-0. Uzuni u fut në fushë kur rezultati ishte 3-2 dhe 4 minuta para fundit gjeti golin e barazimit. Më shumë se goli, trajnerin Silvinjo e kënaq fakti se sulmuesi ka lënë pas dëmtimin dhe është gati para ndeshjes kyçe me Çekinë, që luhet më 12 tetor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
