.png)
Presidentja e Komisionit Evropian, Ursula von der Leyen, mbërrin sot në Tiranë, duke nisur nga Shqipëria turin e saj në Ballkanin Perëndimor.
Gjatë qëndrimit në Tiranë, von der Leyen do të takohet me Presidentin Bajram Begaj dhe më pas, në orën 16:30, me kryeministrin Edi Rama. Takimi me Ramën do të pasohet nga një konferencë e përbashkët për shtyp në orën 17:30.
Më 1 tetor, presidentja e Komisionit Evropian do të vijojë vizitën në Kosovë, ku do të takohet me presidenten në detyrë, Albulena Haxhiun, dhe kryeministrin Albin Kurti. Në të njëjtën ditë, ajo do të udhëtojë drejt Malit të Zi, ku do të zhvillojë takime me presidentin Jakov Milatović dhe kryeministrin Milojko Spajic.
Turneu do të përfundojë të premten në Maqedoninë e Veriut. Atje, von der Leyen do të takohet me presidenten Gordana Siljanovska-Davkova dhe kryeministrin Hristijan Mickoski. Në këtë tur nuk janë përfshirë Serbia dhe Bosnje-Hercegovina. Sipas njoftimit, dy vendet janë lënë jashtë itinerarit për shkak të zgjedhjeve të ardhshme që do të zhvillohen atje.
Presidentja e Komisionit Evropian pritet të sjellë në këtë tur edhe një plan për një udhërrëfyes të posaçëm për Shqipërinë, Malin e Zi, Moldavinë dhe Ukrainën, me synim mbështetjen e tyre në rrugën drejt anëtarësimit në Bashkimin Evropian.
Plani parashikon reforma prioritare, afate orientuese dhe objektiva për përfundimin e fazave të negociatave. Në këmbim, edhe vendet anëtare të BE-së do të kenë angazhime për të avancuar procesin. Vendimet kyçe në këtë proces kërkojnë miratimin unanim të vendeve anëtare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje