Futboll

UEFA e bën zyrtare, organikë me 26 lojtarë për kombëtaret e Euro 2020

UEFA zyrtarizon zgjerimin e organikës së lojtarëve për skuadrat e kualifikuara në EURO 2020. Ishte një vendim që pritej në fakt për shkak të pandemisë së Covid-19 dhe institucioni që drejton futbollin europian tashmë e ka konfirmuar zyrtyarisht.

Trajnerët e kombëtareve pjesëmarrëse në Europian do të kenë një listë me 26 lojtarë të grumbulluar, 3 më shumë se më parë, ku limiti ishte 23 lojtarë. Megjithatë, në protokollin e ndeshjeve do të regjistrohen vetëm 23 lojtarë, duke përfshirë edhe 3 portierët. Tre lojtarët e tjerë të organikës nuk mund të ulen në stol.

Deri më 1 qershor trajnerët duhet të kenë dorëzuar listat e futbollistëve që do të grumbullojnë. Zëvendësimi i ndonjë lojtari mund të bëhet vetëm në rast dëmtimesh të rënda, apo të infektimit nga Covid-19. Lojtarët që dalin pozitivë konsiderohen si rast i sëmundjes serioze, kështu që mund të zëvendësohen para ndeshjes, gjithmonë me miratimin e UEFA-s.


Copyright © Gazeta “Si”


Më Shumë