Një tjetër futbollist shqiptar është zyrtarizuar në kampionatin turk. Kristal Abazaj, kartonin e të cilit e ka në pronësi Anderlehti, është prezantuar sot tek Instanbulspori, ku pak ditë më parë firmosi edhe Eduart Rroca. Të dy kanë luajtur bashkë te Luftëtari, sezonin e fundit te Kukësi dhe tashmë edhe në Turqi do jenë në të njëjtin ekip.
Abazaj, ndryshe nga Rroca, shkon në Turqi në formë huazimi. Klubi i tij i ri dhe Anderlehti kanë arritur marrëveshjen për huazimin 2-vjeçar të sulmuesit të krahut, i grumbulluar më parë edhe në Kombëtare, por i lënë jashtë kohët e fundit për shkak se nuk ka pasur një aktivizim të rregullt.
Tashmë Abazaj, 24 vjeç, synon shpërthimin në Turqi, një kampionat që po bëhet modë për futbollistët shqiptarë. Pas portierit Gentian Selmani vitin e kaluar, në Turqi kanë kaluar edhe sulmuesi i Kombëtares, Armando Sadiku, dhe së fundi Rroca e Abazaj, ndërkohë që ofertat nuk mungojnë edhe për lojtarë të tjerë të kampionatit shqiptar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.