.png)
Rasti i 14 pjesëtarëve të Xhenoas pozitivë me Covid-19 ka tronditur futbollin italian. Ndeshja e radhës për Xhenoan është ajo me Torinon të shtunën, por rreziku që të mos luhet është i madh. Duhet theksuar se UEFA ka vënë si limit numrin 13 të lojtarëve të infektuar për shtyrjen e një ndeshjeje në Kupat e Europës, kurse në Itali nuk ka ende një shifër limit.
Për momentin, në mungesë të një rregulli préciz, ndeshja Xhenoa-Torino duhet të luhet rregullisht. Situata ndryshon, nëse Liga ditët e ardhshme merr një vendim tjetër. Ky është rasti i parë i një infektimi kolektiv dhe pasojat mund të jenë të mëdha. Napoli i Elseid Hysajt, pas lajmit se 14 pjesëtarë të Xhenoas kanë dalë pozitivë, ka bërë tamponët, pasi ka rrezik që edhe lojtarët e tij të jenë infektuar dhe të dielën luhet Juve-Napoli. Hysaj, kapiteni i Kombëtares, ishte titullar ndaj Xhenoas.
Ka pasur edhe raste të tjera të skuadrave me një numër të lartë lojtarësh të infektuar. I fundit është rasti i PSG-së që në javën e parë të kampionatit ndaj Lensit nuk kishte 7 lojtarë për këtë arsye, konkretisht Mbape, Nejmar, Ikardi, Di Maria, Markuinjos, Navas dhe Paredes. Një rast tjetër është ai i Flamengos në Brazil, ku ekipi zbriti në fushë vetëm me 2 titullarë dhe të tjerët lojtarë të rinj, pasi kishte 19 të infektuar me Covid-19.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
