.png)
Në kuvend është paraqitur një projektligj nga deputeti Edmond Stojku në kuadër të masave për të parandaluar përhapjen e Covid-19.
Në fakt projektligji i bën disa ndryshime ligjit “Për parandalimin e sëmundjeve infektive”, ku shtohen detyrime ndaj tregtarëve për të dezinfektuar kamionët e transportit të mallrave.
Referuar projektligjit, kërkohet që Ministria e Shëndetësisë dhe autoritetet doganore të instalojnë pajisje tunele të përshtatshme për dezinfektimin e mjeteve të transporti ndërkombëtar të mallrave, kabinave të tyre dhe kontejnerëve në pikat e kalimit kufitar tokësor, detaj e ajror për të siguruar parandalimin e hyrjes së sëmundjeve të rrezikshme dhe sipas një protokolli të hartuar nga Instituti i Shëndetit Publik.
Projektligji urdhëron që shpenzimet e dezinfektimit të përballohen nga operatori i biznesit përgjegjës për ngarkesën, ndërkohë që tarifat do të përcaktohen nga Këshilli i Ministrave.
Në rast refuzimi nga ana e tregtarëve, projektligji parashikon masa ndëshkuese; që nga gjoba e deri te mbyllja e aktivitetit.
“Refuzimi për vendosjen nën dezinfektim të mjeteve të transportit ndërkombëtar të mallrave, kabinave të tyre dhe kontejnerëve dënohet me 50 mijë lekë për operatorin tregtar objekt i mbikëqyrjes së dezinfektimit dhe 100 mijë lekë për punëdhënësin si subjekt i mbikëqyrjes së dezinfektimit”, thuhet në projektligj
Në rast të përsëritjes së shkeljeve administrative nga operatori tregtar, masa administrative është mbyllja e aktivitetit.
Ndryshimet do të diskutohen në komisionet parlamentare e mandej do të votohen në parlament në një nga seancat e radhshme plenare.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
