.png)
Këshilli i Lartë Gjyqësor i ka dërguar tre emrat Presidentit të Republikës si kandidatë për anëtarë të Gjykatës së Lartë.
Drejtori aktual i Shkollës së Magjistraturës, Sokol Sadushaj është propozimi i parë, ndjekur nga Ervin Pupe dhe Ilir Panda. Kandidaturat janë pjesë e listës që vjen nga radhët e juristëve të spikatur për tre pozicione të lira, një në fushën e të drejtës administrative, një në fushën e të drejtës civile dhe një në fushën e të drejtës penale.
Këshilli i Lartë Gjyqësor njofton se listën me tre emrat ia ka dorëzuar këtë të enjte Presidentit të Republikës për të vlerësuar dhe vendosur emërimin e kandidatëve të propozuar.
Sipas përcaktimeve të Kushtetutës, duke filluar nga marrja zyrtarisht e propozimeve, Presidenti i Republikës ka 10 ditë kohë që të vendosë për emërimin e kandidatëve, ose jo të tyre. Kushtetuta i njeh Presidentit mundësinë e refuzimit të emrave nëse ai mendon se nuk plotësojnë kriteret e kualifikimit, ose kushtet e zgjedhjes sipas ligjit.
Megjithatë, neni 136 i Kushtetutës parashikon si mekanizëm zhbllokues se dekreti i Presidentit e humb fuqinë kur kundër vendimit të tij votojnë shumica e thjeshtë e anëtarëve të Këshillit të Lartë Gjyqësor. Pra, si shembull, nëse Meta vendos të refuzojë njërin prej emrave të mësipërm, KLGj mund të rrëzojë Metën, duke e çuar në Gjykatën e Lartë emrin në fjalë.
Gjithashtu, parashikohet edhe mosveprimi i Presidenit, pra rastet kur Presidenti nuk shprehet as me emërim dhe as me refuzim të kandidaturave. Në këtë rast, i njëjti nen i Kushtetutës përcakton se kandidati shpallet automatikisht i emëruar dhe fillon detyrën brenda 15 ditëve nga data e vendimit të Këshillit të Lartë Gjyqësor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
