Buzëqeshje të sforcuara, vështrime serioze dhe shqetësim. Të shohësh fytyrat e lojtarëve të Bajernit të Mynihut duket sikur je kthyer gati një vit pas. Më 28 shtator të vitit të kaluar u shkarkua trajneri Karlo Ançeloti, jo vetëm për humbjen 3-0 ndaj PSG-së, por edhe për prishjen e raporteve me “senatorët” e skuadrës. Tani situata në Mynih është krejtësisht ndryshe. Me trajnerin Kovaç në krye, bavarezët i kanë fituar 5 ndeshjet e deritanishme në kampionat. Nëse kroati fiton 3 ndeshjet e radhës, me Benfikën në Champions, dhe Shalken e Augsburgun në kampionat, do të barazonte rekordin e Ançelotit në sezonin 2016-17. Po atëherë, çfarë e shqetëson Bajernin? Dëmtimet, sepse janë shumë, janë të rëndë dhe nuk janë të rastësishëm.
Të shtunën Bajerni fitoi 3-1 ndaj Leverkusenit dhe është i vetëm në krye të klasifikimit. Në pjesën e parë Toliso braktisi fushën, pas një përplasjeje me Volland. Në pjesën e dytë ishte Rafinja që u detyrua të dilte nga fusha pas një faulli të rëndë të Belarabit, që u ndëshkua me karton të kuq. Në mbrëmje klubi bavarez qartësoi shkallën e dëmtimeve dhe rezultoi se Toliso ka dëmtuar rëndë meniskun e gjurit të djathtë, kështu që duhet të qëndrojë disa muaj jashtë. Edhe dëmtimi i Rafinjës është serioz: braziliani ka dëmtuar ligamentin e kaviljes së majtë dhe nuk do të jetë gati për katër javë. Në javën e parë të kampionatit ndaj Hofenhajmit, bavarezët humbën francezin Koman, i cili këputi ligamentet nga një faull i rëndë i Shulz ndaj tij. Në ndeshjen e Superkupës kundër Eintrahtit, Alaba la fushën, pasi mori një goditje të fortë në gju, por më pas doli që nuk ishte një dëmtim serioz.
Duke parë gjithë këto dëmtime, në klubin bavarez kanë krijuar bindjen se kundërshtarët, të nervozuar nga supermacia e Bajernit të Mynihut, ndërhyjnë shumë rëndë. Madje, drejtuesit e klubit të madh gjerman shkojnë edhe më tej, duke akuzuar se në ndonjë rast kundërshtarët luajnë edhe pisët. Trajneri Kovaç dhe presidenti Hënes kanë qenë shumë të ashpër në deklaratat e tyre: "Ndërhyrja e Belarabit është më shumë se një ndërhyrje për karton të kuq. Me shqetëson shumë kjo që po ndodh, jemi kthyer në “gjahun” e kundërshtarëve”, - ka thënë trajneri kroat. Durimin e ka humbur edhe presidenti Hënes, i cili ka theksuar: "Si Belarabi mund të ndërhyjë vetëm një i sëmurë mendor. Meriton tre muaj skualifikim për idiotësi". Fillon Championsi dhe Kovaç e aplikon shumë rotacionin, por tani i janë limituar zgjedhjet për të për shkak të dëmtimeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.