.png)
Mbrëmjen e 15 tetorit, katër persona iu vunë nga pas një biznesmeni për ta eliminuar. Andon Dhima po futej në banesën e tij në rrugën “Muhamet Gjollesha”, kur dy persona të maskuar dhe të armatosur e kanë ndjekur deri në hyrje të pallatit, me qëllim për ta eliminuar atë.
Këtë të mërkurë, Policia e Tiranës njoftoi arrestimin e tyre. Ata janë: Grid Leno, 45 vjeç, lindur në Tiranë, i dënuar më parë me 6 vite burg për vjedhje me armë në Gjermani dhe Albin Hoxha, 35 vjeç, lindur në Laç dhe banues në Tiranë, i dënuar më parë për plagosje me armë.
Në sajë të këtij operacioni policor u bë e mundur të identifikohen dhe të ndalohen dhe dy bashkëpunëtorët e tyre në këtë ngjarje, Maringlen Matohiti, 30 vjeç, lindur në Elbasan dhe banues në Tiranë dhe Enea Hoxha, 26 vjeç, lindur në Laç dhe banues në Tiranë, i dënuar më parë me 4 vite e 9 muaj për “Prodhim dhe shitje të lëndëve narkotike”.
Policia thotë se ka sekuestruar një armë zjarri dhe municion luftarak, një mjet në pronësi të Albin Hoxhës, që dyshohet se janë përdorur gjatë ngjarjes.
Gjithashtu janë sekuestruar edhe veshjet e përdorura nga autorët, një shkop hekuri policie nga ato me hapje, një palë pranga, 6 telefona celular, rroba uniforme policie dhe kamuflazhi e prova të tjera materiale.
Ishte vetë biznesmeni Andon Dhima, i cili denoncoi ngjarjen dhe në profilin e tij në rrjetet sociale publikoi pamjet e atentatit të dështuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
