.png)
Një ditë pas mbledhjes së Këshillit Bashkiak, nënkryetari i këtij këshilli, përfaqësuesi i opozitës, Dorian Teliti, tha se mazhoranca në këtë mbledhje votoi kundër kërkesës për audit të huaj mbi të ardhurat dhe shpenzimet e bashkisë.
“Ata i thanë jo kërkesës për kontraktimin e një auditi të huaj mbi të ardhurat dhe shpenzimet e bashkisë.
Ata i thanë përsëri jo, për të disatën herë, ngritjes së Komisionit të Përhershëm 4-vjeçar të Kontrollit Financiar, detyrim ky ligjor dhe i Rregullores së Brendshme të vetë Këshillit, konkretisht neni 36 siç jepet edhe në monitor, duke vazhduar të qënurit në shkelje të rregullores për të 10-in muaj radhazi nga dita e konstituimit të këtij Këshilli në qershor 2023. E qartë që ata nuk duan t’ja dinë as për ligj e as për asgjë tjetër.
Gjithsesi, ne këshilltarët e opozitës nuk dorëzohemi. Askush nuk na pengon dot të kryejmë detyrën tonë për transparencë dhe përdorim të drejtë e ligjor të çdo qindarke të fondeve e burimeve publike.
Kryetari i Bashkisë dhe trupa e tij e këshilltarëve mund të thonë jo sa të duan, është zgjedhja e tyre të mos respektojnë e të shkelin detyrimet kushtetuese dhe ligjore që ngarkon çdo të zgjedhur vendor, por kutia e pandorës është hapur dhe e vërteta do të mbizotërojë e transparenca do të bëhet herët e vonë”, tha Teliti
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
