Puna nga shtëpia, nevoja e shtuar për produkte teknologjike për të përmbushur detyrimet nga mjediset e punës në shtëpi, nevoja e shtuar për medikamente në kohën e pandemisë së COVID-19, teksa oferta ka qenë e kufizuar për shkak të bllokimeve, ka rritur çmimet e produkteve të importuara në vend.
Këtë e konfirmon edhe INSTAT në raportin më të fundit për Indeksin e Çmimeve të Importit.
Të dhënat e Institutit të Statistikave tregojnë se në tremujorin e tretë të vitit 2020, ky indeks arriti 94,6 duke shënuar një rritje me 0,9 %, në krahasim me tremujorin e tretë 2019. Krahasuar me tremujorin e dytë 2020 indeksi shënoi një rritje me 0,3 %.
Rritja më e madhe e çmimeve të importit prej 1,3 % ka qenë te produktet e seksionit “Industria përpunuese”. Brenda këtij seksioni rritja më e madhe e çmimeve vërehet në produktet e aktivitetit “Prodhimi i produkteve optike, elektronikë, kompjuterikë” me 5,3 %, pasuar nga aktivitetet “Përpunimi i produkteve dhe preparateve farmaceutike” me 4,1 %.
“Prodhimi i makinerive dhe paisjeve ” me 3,7 %, “Prodhimi i lekurës dhe produkteve prej lekurë” me 3,6 %, etj. Por, çmimet në aktivitetin “Metalurgjia” kanë shënuar ulje me 3,9 %, pasuar nga “Prodhimi i produkteve të kauçukut dhe plastikës” me 2,5 %, “Shtypshkrime dhe rigrupim i mediave të rregjistruara” me 1,8 %, etj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.