Gjykata Kushtetuese pritet që të dalë sot me një vendim në lidhje me padinë e dorëzuar nga Presidenti Ilir Meta që në vitin 2018 për çështjen e Teatrit Kombëtar.
Një ditë më parë, gjykata u mblodh në një seancë maratonë që zgjati më shumë se 10 orë dhe u mbyll në orët e vona të mbrëmjes. Në këtë seanca u bë gjykimi në themel i çështjes, ku përfaqësuesit e Presidentit dhe Aleanca për Mbrojtjen e Teatrit kërkuan shfuqizimin e ligjit special, vendimit të Qeverisë për kalimin e truallit në dorëzim të Bashkisë së Tiranës dhe vendimit të Bashkisë së Tiranës për shembjen e godinës.
Gjykata dëgjoi pretendimet e Presidencës dhe Aleancës nga njëra anë dhe të Qeverisë e Kuvendit në anën tjetër.
Presidenca kërkoi që gjykata të vendosë pezullimin e çdo veprimi, ndëras Aleanca për Mbrojtjen e Teatrit tha se shpresonte në një vendim të drejtë, sepse në të kundërt do t’u drejtohej gjykatave ndërkombëtare.
Kuvendi tha se ligji special i miratuar është në përputhje me Kushtetutën dhe në të u reflektuan edhe vërejtjet e Presidentit Ilir Meta që e ktheu fillimisht për rishqyrtim.
Nga Qeveria thanë se vetë kërkesa e Presidencës nuk bazohet në fakte ligjore dhe e cilësoi të gjithë çështjen si të padenjë për t’u gjykuar nga Gjykata Kushtetuese.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.