.png)
Herën tjetër që do të shqetësoheni për të rinjtë që shpenzojnë shumë kohë në TikTok, mendoni se ata mund të jenë thjesht duke studiuar për provime.
Duke filluar nga viti i ardhshëm, një universitet në Irlandë po ofron një diplomë bachelor në artin e të bërit bloger ose influencer.
Kurset përfshijnë menaxhimin e krizave, marrëdhëniet me publikun, studimet e të famshmëve, psikologjinë sociale dhe redaktimi video dhe audio. Dhjetëra studentë do t'i bashkohen programit në vitin 2024, me shpresë për të marrë një profesion që ka shumë të rëndësishme vëmendjen dhe që mund të jetë fitimprurës nëse është i sukseshëm, por që kurrë nuk i dihet.
Irene McCormick, një pedagoge në Universitetin Teknologjik Juglindor (SETU) në Carlow, Irlandë, e cila hapi programin, tha për The Washington Post se edhe pse më parë janë ofruar kurse për këtë profesion, universiteti do të jetë i pari në të gjithë botën që ofron një program dhe një diplomë në përfundim të studimeve për profesionin si influencer.
Harvard Business Review studioi tregun dhe doli në përfundimin se vlera globale e tregut të influencuesve shkoi në 16.4 miliardë dollarë vitin e kaluar.
Në mesin e Gjeneratës Z (9 deri në 24 vjeç), profesioni është veçanërisht tërheqës, me studimet që kanë treguar se 1 në 4 të rinj aspirojnë të bëhen influencer.
Megjithatë, akademikët ngrenë shqetësime për qëndrueshmërinë e diplomës në vitet në vijim, duke pasur parasysh natyrën gjithnjë në ndryshim të mediave sociale.
Vendimi për të hapur një program erdhi gradualisht.
Në vitin 2019, McCormick u kthye në shtëpi pas ditës së parë të vitit shkollor dhe mësoi nga vajza e saj se një nga studentet e reja, Lauren Whelan, ishte një "yll i TikTok me mijëra ndjekës”.
Reagimi i vajzës së saj për faktin se mamaja e saj kishte nxënëse një yll TikTok-u e bëri McCormick të njohë ndikimin që kanë influencuesit tek brezat e rinj.
“Kjo çoi në krijimin e një programi veror, Digital Hustle, për adoleshentët e interesuar të mësojnë se si të bëhen influencer të mediave sociale”, tha McCormick. Për të paktën dy vjet, programi veror ftoi yjet e TikTok dhe ekspertët e medias për t'u mësuar studentëve të rinj se si të ndërtojnë një emër të njohur.
Pas suksesit që kishte ky program veror, McCormick thotë se nuk e kishte aspak të vështirë të vendoste se duhej një program i mirëfilltë për këtë profesion.
“Ne thjesht duhej të hapnim një program ku në fund të tij të dorëzonim një diplomë bachelor.
Disa ekspertë theksuan se kërkesa mes të rinjve për profesione që i shmangen punës tradicionale 9-me-5 është rritur që nga pandemia.
“Tani, më shumë se kurrë, të gjithë duan të kenë kontroll mbi jetën e tyre. Dhe një karrierë si influencer premton një karrierë të pavarur”, thotë Brooke Erin Duffy, pedagoge e komunikimit në Universitetin Cornell.
“Të gjithë duan të punojnë nga distanca. Të gjithë duan të vendosin vetë oraret e tyre të punës”.
“Ka ndryshuar gati çdo profesion”, thotë Dawn Lerman, pedagog në departamentin e marketingut në Fordham Graduate School of Business.
Historikisht, universitetet trajnonin studentët që të ishin gati për karrierë, në krahasim me punët. “Kompanitë dhe organizatat sot punësojnë studentë që janë gati për punë specifike në ditën e tyre të parë,” thotë Lerman.
Në një farë mase, programi ofron lëndë të ngjashme me ato të një diplome të marketingut dixhital. Sidoqoftë, programi unik i SETU-së mund t'i inkurajojë studentët të jenë "të këqij dhe sipërmarrës", tha Duffy.
Diploma e re e SETU po vjen gjithashtu në një kohë kur "kompanitë e platformës po tregojnë se karriera e influencuesve është një punë ëndrrash me të ardhura të mëdha”, shtoi Duffy.
Realiteti mund të jetë më pak magjepsës. Duffy thotë se influencuesit kanë beteja të vazhdueshme me algoritme të paqëndrueshme që ndryshojnë shpesh, platforma të mediave sociale që zbulohen brenda natës dhe ngacmime nga shikuesit.
Industritë krijuese kanë qenë gjithmonë të paqëndrueshme, por industria e të qenurit influencer përballet me sfida unike sepse algoritmet ndryshojnë papritur, ka shpesh risi dhe veçori të veçanta, si videot me formë të shkurtër, mund të bëhen të parëndësishme shpejt dhe platformat mund të zhduken plotësisht.
"Niveli i pasigurisë në platforma ka shumë të ngjarë të bëjë që shumë nga trajnimet specifike të bazuara në platformë të vjetërohen pothuajse menjëherë," tha Duffy.
Vitin e ardhshëm, SETU do të regjistrojë 40 studentë, por McCormick nuk është ende e sigurt se sa të tjerë do të aplikojnë.
Nga: Washington Post. Përshtati: Gazeta Si.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
