.png)
Disa shtete amerikane po përpiqen të parandalojnë zhdukjen e shkrimit të dorës, ndërsa shkollat gjithnjë e më shumë po ndërrojnë stilolapsin dhe letrën me tableta dhe kompjuterë.
Qeveria e SHBA-së e hoqi shkrimin e dorës nga kurrikula bazë në 2010 për shkak të pretendimeve se nuk do të ishte e dobishme në epokën e teknologjisë.
Shkrimi i dorës konsiderohet si një aftësi e shkëlqyer motorike që stimulon dhe sfidon trurin, por me shkollat që i drejtohen teknologjisë, disa mësues ankohen se nxënësit dhe studentët mezi mbajnë një laps.
Nxënësit me aftësi të kufizuara në të nxënë si disgrafia, kur fëmijët dinë të lexojnë, por kanë vështirësi në shkrim mund të preken gjithashtu.
Studimet e mëparshme kanë zbuluar se rezultatet e IQ kanë rënë për herë të parë në një shekull dhe kanë treguar se teknologjia mund të jetë fajtore.
Mësuesit, prindërit dhe ekspertët me të cilët foli DailyMail thanë se po shihnin fëmijë dhe të rinj të cilët nuk dinë të nënshkruajnë emrin e tyre ose thjesht të hedhin firmën e tyre.
Projektligje të reja janë miratuar në shtete si Kalifornia dhe Nju Jorku që kërkojnë nga nxënësit e moshës 6 deri në 12 vjeç të mësojnë shkrimin e dorës, ndërsa disa ende hezitojnë të kthehen mbrapa, duke përfshirë Kolorado, New Mexico dhe Nevada.
"Do të doja që nxënësit të mësonin se si të shkruanin me shkrim dore por është gjithmonë telefoni në mes”, tha për DailyMail Tracy Bendish, terapiste e autizmit.
Vitin e kaluar, studiuesit në Universitetin e Oregon dhe Northwestern raportuan se rezultatet e IQ kishin rënë sepse teknologjia zvogëlon nevojën për të menduar thellë.
Ekspertët u kanë kërkuar qeverive dhe administratorëve të shkollave që të rikthejnë shkrimin e dorës në shkolla, duke përmendur nxënësit e klasës së gjashtë që kanë vështirësi të mbajnë një laps, por mund të përdorin pajisjet dixhitale me lehtësi.
Një sondazh i vitit 2021 zbuloi se 45 për qind e amerikanëve kanë vështirësi të lexojnë shkrimin e tyre, ndërsa 70 për qind raportuan se kanë probleme me leximin e shënimeve nga kolegët e tyre.
Hetty Roessingh, pedagoge në Universitetin e Calgary-t tha se 5-vjeçarët nuk po përmbushin standardet akademike për shkak të aksesit të pajisjeve digjitale.
Një studim i ri i publikuar në shkurt nga studiuesit në Universitetin Norvegjez të Shkencës dhe Teknologjisë (NTNU) zbuloi se shkrimi i dorës lidhet me rritjen e funksionit kognitiv të trurit, aftësive motorike dhe kujtesës.
Demokratja Sharon Quirk-Silva prezantoi një projektligj në Kaliforni vitin e kaluar, duke përmendur nevojën që nxënësit jo vetëm të jenë në gjendje të shkruajnë me shkrim dore, por edhe ta lexojnë atë.
“Nëse shkrimi i dorës zhduket, do të ishte një humbje e madhe për të kuptuar historinë ose për t'u lidhur me të kaluarën”, thotë Roessingh.
Për më tepër, një pjesë e historisë mund të humbasë për brezat e rinj të cilët nuk janë mësuar të lexojnë dhe të shkruajnë me shkrim dore, duke i lënë ata të paaftë të lexojnë dokumente të vjetra, me një rëndësi të madhe.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
