.png)
Superiorja rikthehet me duele për “jetë a vdekje”. Tre skuadrat që duan të sigurojnë qëndrimin në elitën e futbollit shqiptar në dy ndeshje mjaft interesante. Pas dy fitoreve radhazi, Kukësi do të kërkojë të tretën këtë herë nën drejtimin e trajnerit të ri, Mirel Josa. Ky i fundit menjëherë do të vihet përballë të kaluarës së tij, Skënderbeut, që kanë harruar të fitojnë prej katër ndeshjesh dhe rezultatet e fundit kanë bërë që tashmë ekipi të mbyllë renditjen e Superiores dhe të rrezikojë mbijetesën në elitë.
Kastrioti, që javët e fundit po vuan për rezultate, në Kamëz pret Bylisin. Një betejë mes dy ekipeve që praktikojnë një futboll me plot përplasje, që në ndonjë rast edhe mund ta kalojnë cakun. Krutanët vijnë me moralin lart pasi kanë ndalur në barazim kryesuesit e Vllaznisë dhe në rast të një fitoreje atëherë do të krijonin një avantazh sigurie mes tre vendeve të fundit, ku bëjnë pjesë edhe ballshiotët.
Nesër do të zhvillohen tre ndeshje të tjera. Spikat Partizani-Vllaznia më së shumti, që luhet prej orës 16:45, kurse në mesditë luhen Laçi-Teuta dhe Apolonia-Tirana.
Ndeshjet:
13:45 Kastrioti-Bylis
13:45 Skënderbeu-Kukësi
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
