Studentët vazhdojnë ngujimin në mjediset e fakulteteve. Ata thonë se janë të vendosur për të mbrojtur kauzën e tyre. Grupe studentësh kanë kaluar natën brenda godinave pa ngrohje dhe shprehen se nuk do të ndalen derisa qeveria të plotësojë kërkesat e tyre. Gjithashtu me studentët janë solidarizuar bashkëmoshatarë të tyre, që i kanë dërguar mbrëmjen e djeshme edhe ushqime.
Studentët e Ekonomikut janë shprehur për Gazetën “Si” se do të vazhdojnë ngujimin me turne dhe do të ndërrohen vazhdimisht me njëri-tjetrin. Dyert e fakulteteve qëndrojnë të mbyllura dhe policët nuk kanë lejuar që studentët e tjerë të futen brenda territorit të fakulteteve. Studentët janë shprehur se ky është një provokim nga ana e rojeve private dhe gjatë gjithë kohës ata i kërcënojnë, por ata shprehen të vendosur se do të vazhdojnë ngujimin.
“Dera është e mbyllur zinxhirë. Gjatë ditëve të zakonshme dera mbyllet me çelës, ndërsa tani e kanë ndryshuar. Na thonë se kanë urdhër nga qeveria që të mos futet njeri në fakultet, ndërkohë që studentët e tjerë që duan të na mbështesin kanë ngelur jashtë. Gjatë gjithë kohës kemi provokime dhe kërcënime nga policët e sigurisë, ndërsa ushqimet dhe batanijet i kemi marrë nga hekurat,” shprehet njëra prej studentëve.
Ndërkohë që në fakultetet e tjera si i Inxhinierisë dhe Arkitekturës në moment kur studentët kanë tentuar të marrin ushqime janë përplasur me punonjësit e policisë. Gjithashtu në fakultetin e filologjikut shihet një grup i vogël studentësh të cilët vazhdojnë të protestojnë për plotësimin e kërkesave të tyre.
Ndryshe nga ditët e tjera, gjatë ditës së sotme shihet një situatë më e qetë, por studentët gjatë gjithë kohës shprehen se protesta do të përshkallëzohet edhe në forma të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.