.png)
Luçiano Boçi, nënkryetar i PD, Rithemelimi zbuloi planin e protestës së ardhshme të opozitës. Pas Bashkisë së Tiranës, ku prej javësh po kërkojnë dorëheqjen e Erion Veliajt, ai deklaroi në studion e “Debat” në A2CNN, se opozita do të dalë në protestë para Kryeministrisë, “me qëllim që SPAK-u të stimulohet” dhe t’i drejtohet edhe atij që e quajti “njeriu i paprekshëm”.
“Testin opozita e ka kaluar, ajo ushtron presion dhe SPAK-u është i detyruar të hapë çështje penale. Sot, të gjitha çështjet penale që ka SPAK-u janë për shkak të presionit të opozitës: inceneratori, sterilizimi dhe të tjera. Meqënëse kjo funksionon, niveli i protestës duhet të rritet, të dalë edhe para Kryeministrisë, me qëllim që SPAK-u të stimulohet dhe të kapërcejë pengesat për të dalë aty ku të gjithë duam: të godasë korrupsionin dhe aferat”, tha Boçi.
Sipas nënkryetarit të PD, Rithemelimit, “përderisa SPAK-u nuk lëviz vetë dhe ka shenja që lëviz sipas protestës, pse jo, protesta të zhvendoset edhe para Kryeministrisë, me qëllim që SPAK-u të drejtohet edhe te “njeriu i paprekshëm”. Sepse ai vendos dhe përcakton gjithçka që ndodh. Të goditet pra ai person që rregullon të gjithë këmbët e oktapodit sepse ka menaxhim të tipit mafioz”.
Boçi tha se kjo po diskutohet në forumet e selisë blu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
