Pas analizave të Bankës së Shqipërisë në lidhje me zhvlerësimin e monedhës europiane euro, që konkludoi se ndodhi për shkak të forcimit të lekut sepse ekonomia shqiptare ka njohur rritje, Lëvizja Socialiste për Integrim mendon ndryshe.
Deputeti Përparim Spahiu shkruan në llogarinë e tij në facebook se “Banka e Shqipërisë thotë se rënia e Euro-s ishte e papritur. Madje, BSH shton se faktorët psikologjik paskan zhvlerësuar monedhën europiane. Në fakt, kjo e dyta është një argument artificial, pasi Euro zhvlerësohet vetëm nëse ka qarkullim të tepërt të kësaj monedhe në treg. Normalisht për BSH, ishte e papritur kanabizimi i gjithë vendit, dhe eksportit të saj në Europë.”
Për Spahiun, nëpërmjet shitjes së drogës, u injektua në treg një sasi e madhe e valutës europiane.
Gjithashtu, qarkullimi i parasë informale në tregun shqiptar, shkruan deputeti i LSI-së, si pasojë e korrupsionit, solli rënie të Euros. “Mos kërkoni gjurmët, kur ujkun e keni përpara syve!”
Një ditë më parë në raportin e politikës monetare për tremujorin e parë të vitit 2019-ës, Banka e Shqipërisë rendiste faktorët e forcimit të lekut; “Trendi forcues i kursit të këmbimit pasqyron përmirësimin e pozicionit të jashtëm të ekonomisë dhe rritjen e interesit për të investuar në instrumente kursimi në lekë në tregun e brendshëm financiar.”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.