Ndërkohë që Greqia bëhet gati për një përballje të pashembullt politike për ratifikimin e marrëveshjes së emrit me Maqedoninë, një pjesë e qytetarëve kanë rënë sërish pre e nacionalizmit, duke mbajtur të dielën protesta të dhunshme në Athinë.
Marrëveshja Prespës do të shkojë sot përpara komisionit të punëve të jashtme të Parlamentit për debat. Mbetet e paqartë se sa sesione do të kërkojë komisioni për të shqyrtuar marrëveshjen përpara se ta dërgojë zyrtarisht për votim në parlament. Megjithatë, kryetari i parlamentit Nikos Voutsis deklaroi javën e kaluar se marrëveshja do të shkojë për ratifikim deri në fund të kësaj jave.
Por shoqëria greke dhe bota politike e vendit fqinj është thellësisht e ndara. Sipas sondazheve, publiku është kundër marrëveshjes dhe deri në 70% e qytetarëve grekë janë shprehur kundër saj.
Sipas opinionistëve në Greqi, dhjetëra mijëra protestuesit që demonstruan në mitingun e së dielës në Athinë, treguan edhe një herë se ndjenjat nacionaliste mbi këtë çështje janë të larta.
Kryeministri Alexis Tsipras fajësoi ekstremistët për dhunën përpara ndërtesës së parlamentit, ndërsa udhëheqësi i opozitës, Kyriakos Mitsotakis, kritikoi qeverinë për përdorimin e zgjeruar të gazit lotsjellës dhe bëri thirrje për një hetim. Pavarësisht nga zërat e arsyes që kërkojnë bashkëpunim dhe arritjen e një kompromisi, Tsipras dhe Mitsotakis duke se po përgatiten për të sfiduar njëri-tjetrin në parlament.
Kryeministri i majtë po përpiqet të përdorë marrëveshjen e Prespes për të krijuar një koalicion të gjerë "progresiv" që shtrihet përtej Syriza-s, ndërkohë që udhëheqësi konservator i Demokracisë së Re, i cili kryeson në sondazhe, po përpiqet ta mbajë partinë e tij të bashkuar, pasi mbi çështjen e emrit ka qasje të ndryshme, dhe të fitojë zgjedhjet e ardhshme me një shumicë absolute.
SYRIZA qeverisëse ka 145 deputetë dhe tanimë duket se ka siguruar votat e ministres së turizmit Elena Kountoura, deputetëve të Potamit, Stavros Theodorakis, Spyros Lykoudis dhe Giorgos Mavrotas, Spiros Danellis dhe deputetit Thanasis Papachristopoulos.
Mbrëmë edhe Thanasis Theocharopoulos, kreu i të Majtës Demokratike deklaroi se do të mbështeste marrëveshjen. Po ashtu edhe Zëvendësministrja e Sigurisë së Qytetarëve Katerina Papacosta, ish-anëtare e Demokracisë së Re, pritet gjithashtu të votojë pro marrëveshjes. Pra, sipas përllogaritjeve, marrëveshja e Prespës pritet të kalojë me të paktën152 ose 153 vota.
Ish-kryeministri Jorgos Papandreu, i cili nuk është anëtar i parlamentit, por ka punuar pafund për këtë çështje, si ministër i jashtëm dhe kryeministër, ka dalë po ashtu publikisht në mbështetje të marrëveshjes, një lëvizje që erdhi në kohën e duhur për Alexis Tsipras.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.