.png)
Gjykata e Apelit ka liruar nga qelia dy infermieret e tjera të spitalit “Shefqet Ndroqi” në Tiranë.
Dy infermieret, Sheqerije Koçi dhe Mira Bushi janë njohur sot me masën e re, e cila do të jetë detyrim paraqitjeje.
Punonjëset e “Sanatoriumit”, u arrestuan disa ditë më parë si pjesë e skandalit që u bë publik në spitalin “Shefqet Ndroqi”.
Ato u akuzuan si bashkëpunëtore të sanitares Tire Alldervishi, për krijimin e një skeme të mirëfilltë me qëllimin e vetëm kriminal, duke përfituar ndaj pacientëve të sëmurë me Covid-19 dhe familjarëve të tyre.
Tri javë më parë, gjykata liroi infermieren Sidorela Çela dhe sanitaren Rukie Hoxha, të dyshuara si bashkëpunëtore të Tire Alldervishit.
Më 10 shkurt, gjykata caktoi ndaj 4 të dyshuarave masën e sigurisë 45 ditë burg, ndërsa si provë, akuza solli në gjykatë edhe fshirjen e të gjitha bisedave në celular mes të ndaluarave dhe Tire Alldervishit.
Ndërkohë ato janë pezulluar nga detyra si pjesë e spitalit “Shefqet Ndroqi” deri në përfundim të hetimit penal nisur nga prokuroria e Tiranës, për akuzën e vjedhjes me anë të mashtrimit, shpërdorimit të detyrës dhe korrupsionit.
Tire Alldervishi, e cila u hoq si infermiere, u arrestua pas publikimit të pamjeve që tregonin se ajo kishte marrë 8 milionë lekë të vjetra nga vajza e një pacienteje me Covid që më pas ndërroi jetë për shkak të kësaj sëmundje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
