.png)
Një grua nga Shqipëria është arrestuar në Londer nën dyshimin se ka ndihmuar grupe kriminale shqiptare që të pajisen me 500 pasaporta nga Mbretëria e Bashkuar.
Arrestimi i saj është bërë nga Agjencia Kombëtare e Krimit në kuadër të një operacioni që synonte identifikimin e një rrjeti kriminal që lehtësonte dhënien e shtetësisë dhe pasaportave britanike, si dhe pastrimin e parave për kriminelët.
Emri i gruas nuk bëhet i ditur, me përjashtim të vendbanimit të saj, që sipas mediave britanike është në Ilford, në lindje të Londrës.
Sipas policisë britanike, dyshohet se ky rrjet i ka ofruar shërbime kriminelëve, përfshirë trafikantëve të njerëzve dhe drogës, apo edhe rrëmbyesve.
37-vjeçarja është arrestuar një ditë më parë me akuzën e mashtrimit dhe dyshohet se kishte ngritur një biznes me identitet fals, duke ndihmuar me pajisjen me pasaporta të qindra personave.
Megjithatë, Agjencia Kombëtare e Krimit, bën me dije se ajo është e lënë lirë sot, teksa hetimet për përfshirjen e saj po vijojnë.
“Ne besojmë se ky rrjet i ka ofruar kriminelëve një mënyrë për të marrë pasaporta në Mbretërinë e Bashkuar, duke u dhënë atyre mjetet për të kryer krime të rënda dhe për të lëvizur nën radarin e zbatimit të ligjit”, u shpreh Andrea Wilson, kreu rajonal i Agjencisë Kombëtare të Krimit.
Nëntë vetë u arrestuan për shkelje të emigracionit, ndërsa gjashtë biznese janë referuar për masa ndëshkimore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
