.png)
Një në dy europianë janë të hapur për të blerë makina kineze, dhe eventi Auto China 2026 e vërtetoi.
Lëvizja nëpër sallat e mbipopulluara të Auto China 2026 kërkonte shumë energji, për shkak të numrit të madh të makinave që po tërheqin vëmendjen e europianëve.
Për herë të parë, eventi u zhvillua në dy qendra ekspozimi në Pekin, duke mbuluar së bashku një sipërfaqe rekord prej 380.000 metrash katrorë.
Me temën “Lead the Era, Intelligent Future” (Udhëheq Epokën, e Ardhmja Inteligjente), konferenca theksoi shtytjen e Kinës drejt elektrifikimit dhe teknologjisë inteligjente të automjeteve, duke tërhequr vëmendje të fortë ndërkombëtare.
Industria automobilistike kineze është bërë gjithnjë e më e orientuar drejt eksportit. Duke u bazuar në avantazhet në bateri, softuer dhe shërbime të lidhura, prodhuesit kinezë ofrojnë çmime konkurruese dhe cikle të shpejta prodhimi.
“Sipas studimeve një në çdo dy konsumatorë europianë janë të hapur për të blerë një makinë kineze si makinë e ardhshme,” tha Georg Mrusek, ekspert i industrisë automobilistike dhe Kinës në kompaninë konsulente Horváth.
Analizat e Horváth tregojnë se në disa vende europiane, si Norvegjia, Mbretëria e Bashkuar dhe Italia, pjesa e tregut të makinave kineze tashmë kalon 10%, ndërsa makinat elektrike kineze përbëjnë rreth 14% të tregut europian të EV.
Mrusek parashikon që pjesa e Kinës në Europë mund të arrijë 15-25% brenda 4-5 viteve. Kjo do të sjellë konkurrencë më të fortë në çmime, teknologji dhe shërbime digjitale, si dhe më shumë prodhim lokal dhe partneritete.
Nëse trendi vazhdon, markat kineze mund të kalojnë mbi 30% të tregut europian në dekadën e ardhshme, nëse arrijnë të përmirësojnë shërbimin pas shitjes, përshtatjen lokale dhe përmbushjen e rregullave.
“Prodhimi i makinave nuk ka të bëjë më vetëm me makinën. Makina po bëhet një platformë teknologjike që lidh jetën e njerëzve,” tha James Pearson, themelues dhe CEO i agjencisë Lionheart Global. Ai shtoi se prodhuesit tradicionalë duhet të ecin me këtë ritëm, pasi makinat kineze po integrojnë me shpejtësi AI, shërbime dhe ekosisteme më të gjera.
Sipas një analize nga S&P Global, Kërkesa në rritje për makinat kineze në Europë,një treg ku tradicionalisht kanë dominuar markat europiane dhe amerikane, do të ndryshojë ndjeshëm flotën e automjeteve në qarkullim dhe segmentin e shërbimeve pas shitjes gjatë dekadës së ardhshme.
Pjesa e tregut të makinave kineze në Europë arriti në 5.8% në vitin 2025, pothuajse dyfish më shumë se në vitin 2024. Parashikimet tona për industrinë automobilistike tregojnë se kjo shifër mund të rritet deri në rreth 15.5% në vitin 2035, me më shumë se 2.1 milionë automjete të reja të shitura në tregun europian atë vit.
Rreth 44% e makinave kineze të shitura në Europë pritet të prodhohen brenda Europës ose në Turqi, pasi markat e mëdha automobilistike po zgjerojnë prodhimin e tyre lokal për të shmangur tarifat e Bashkimit Europian ndaj makinave elektrike kineze.
Vlerësohet se në vitin 2035 do të ketë rreth 11 milionë automjete me motor benzine nga prodhuesit e Kinës në rrugët e Europës, nga mbi 4 milionë automjete në vitin 2025, një rritje relativisht e moderuar duke marrë parasysh kalimin drejt elektrifikimit.
Ndërkohë, numri i makinave elektrike kineze në qarkullim pritet të rritet ndjeshëm, duke arritur në mbi 9.5 milionë automjete në përdorim në vitin 2035, nga më pak se 1 milion në vitin 2025.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje