Nga Gazeta ‘SI’ - Rreth 80 mijë automjete u blenë në Shqipëri gjatë të gjithë 2023-shit duke arritur kështu një rekord të ri. Vetëm në muajin dhjetor në vend kanë hyrë më shumë se 8 mijë e 600 automjete. Nga viti 2022, janë blerë rreth 20 mijë mjete më shumë.
Rreth 85% e tyre janë makina personale, 7% motorë dhe pjesa tjetër mjete transporti më të mëdha.
Sipas të dhënave që jep Drejtoria e Shërbimeve Rrugore, DPSHTRR, ka një zhvendosje të trendit dhe shqiptarët po blejnë më shumë makina të reja dhe më të shtrenjta. Gjithsesi dominojnë përsëri mjetet +10-vjeçare, 51% të blerjeve.
11.2% e makinave të reja (mbi 7. 3 mijë) janë të prodhuara 4 vitet e fundit. 10% (rreth 7 mijë) janë prodhuar 5-8 vitet e fundit, pra relativisht mjete të reja.
Pjesa më e madhe u ble në Tiranë mbi 31 mijë, ndjekur nga Durrësi 12 mijë dhe Fieri 7 mijë.
Mercedes-Benz ka rënë përfundimisht nga froni si firma e preferuar e shqiptarëve dhe është zëvendësuar me Volkswagen e cila mban vendin e parë me 24.6% të makinave të reja të blera këtë vit. Ndaj totalit vetëm 17 % janë Benz. E treta në radhë qëndron Audi me 12.5%.
Në rritje vazhdon të jetë edhe tregu i mjeteve elektrike, ndonëse jo me shumë shpejtësi. Deri në nëntor 2023 ishin regjistruar më shumë se 4 mijë mjete elektrike apo hibride.
Pas Gjermanisë dhe Italisë, Koreja e Jugut është kthyer në importues me rëndësi të mjeteve në Shqipëri.
Në Shqipëri qarkullojnë 867.765 mjete.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.