.png)
Raporti më i ri i Bankës Botërore që mat lidhshmërinë duke krijuar një tregues të ri, indeksin e Lidhshmërisë Shumëdimensionale (MDC), që kombinon disa kanale të lidhjeve ndërkombëtare, duke përfshirë: tregtinë, IHD, migrimin, teknologjinë e informacionit dhe komunikimit (TIK) dhe lidhjet e transportit tregon se nën-rajonet që janë të lidhura më së miri në Europë dhe Azinë Qendrore janë Europa Perëndimore, dhe më pas Europa Veriore, Qendrore dhe Jugore. Ballkani Perëndimor, Azia Qendrore dhe Kaukazi i Jugut kanë nivelet më të ulëta të lidhshmërisë në përgjithësi.
Raporti gjithashtu tregon se përfitimet e këtyre lidhjeve ndërtojnë njëra mbi tjetrën, duke shquar përfitimet që u ofrohen vendeve nëpërmjet transferimeve të njohurive të nënkuptuara në zinxhirët e furnizimit rajonal dhe njohuritë pasuese të dorës së parë “të mësuara duke bërë”, që nuk transmetohen lehtësisht nga librat ose planet skematike.
“Ky raport tregon se lidhshmëria më e madhe ekonomike çon në përhapjen e njohurive dhe rritjen më të madhe të të ardhurave për shoqëritë, por edhe më shumë për 40 përqindëshin që janë në pjesën e poshtme të shpërndarjes së të ardhurave”-Hans Timmer
“Ky raport tregon se lidhshmëria më e madhe ekonomike çon në përhapjen e njohurive dhe rritjen më të madhe të të ardhurave për shoqëritë, por edhe më shumë për 40 përqindëshin që janë në pjesën e poshtme të shpërndarjes së të ardhurave”, thotë Hans Timmer, kryeekonomist i Bankës Botërore për Europën dhe Azi Qendrore.
Lidhshmëria ndërkombëtare përmes tregtisë, investimit, migrimit, komunikimit dhe transportit është kritike për zhvillimin ekonomik në Europë dhe Azinë Qëndrore. Këto lidhje punojnë së bashku për të ndihmuar kompanitë që të bëhen më produktive përmes transferimit të njohurive dhe teknologjisë, citon raporti Lidhjet kritike: Promovimi i rritjes dhe rimëkëmbëshmërisë ekonomike në Europë dhe Azi Qendrore. Ky raporti analizon ndikimin në rritje që kanë llojet e ndryshme të lidhshmërisë, për të ndihmuar politikëbërësit që të maksimizojnë përfitimet ekonomike të këtyre lidhjeve në mbarë Evropën dhe Azinë Qendrore.
Në Europë, shumë politika kanë mbështetur format e ndryshme të lidhshmërisë që çuan në zhvillimin e zinxhirëve të fuqishëm të furnizimit dhe hapën dyert për produktivitet dhe rritje më të madhe. Në Azinë Qendrore, ndërkohë që lidhshmëria mbetet modeste, investimet dhe politikat për përmirësimin e tregtisë, infrastrukturës dhe integrimit janë duke çuar në rritjen e lidhjeve në të gjithë rajonin dhe më gjerë.
Indeksi MDC sugjeron që lidhshmëria kontribuon me gati gjysmë përqindje në rritjen vjetore të PBB-së reale në Europë dhe Azi Qëndrore, ku dyzet përqindëshi nga pjesa e poshtme e fituesve të të ardhurave kanë shënuar rritje prej rreth 1 për qind.
“Rritja e integrimit ndërkombëtar lehtëson transferimin e teknologjisë dhe ideve midis vendeve, kompanive dhe njerëzve – gjë që është thelbësore për t’i dhënë hov rritjes afatgjatë dhe prosperitetit të përbashkët”, thotë David Gould, ekonomist kryesor i Bankës Botërore për rajonin e Europës dhe Azisë Qendrore dhe autor kryesor i raportit. “Për më tepër, ashtu si rrjetet shoqërore, lidhja me vendet e lidhura mirë sjell më shumë njohuri dhe teknologji sesa të lidhjet me partnerët e izoluar”.
Raporti konstaton se lidhshmëria e rritur gjithashtu i ekspozon vendet në rajon ndaj riskut të tronditjeve ekonomike. Megjithatë, me ofrimin e burimeve alternative të kërkesës dhe financimit të jashtëm, lidhjet e larmishme mund t’i zvogëlojnë këto risqe dhe t’i ndihmojnë vendet që të menaxhojnë tronditjet e brendshme dhe të jashtme.
Raporti thekson se shumë vende në rajon kanë ndërtuar lidhshmëri më të madhe, duke avancuar zhvillimin ekonomik gjatë njëzet e pesë viteve të fundit. Sidoqoftë, përfitimet ekonomike të lidhshmërisë përmes transferimit të njohurive dhe teknologjisë nuk janë gjithmonë të dukshme, ndërkohë që sfidat e pasigurisë ekonomike zakonisht janë të dukshme. Duke i njohur sfidat, si dhe duke i bërë të qarta mundësitë potenciale të lidhshmërisë më të madhe përmes kanaleve të ndryshme, raporti Lidhjet kritike mund t’i ndihmojë politikëbërësit në ndërtimin e themeleve për thellimin e lidhjeve të rëndësishme në dekadat vijuese.
Ndërlidhjet infrastrukturore
Studimi i Bankës Botërore tregon se Shqipëria shfaq dobësi në lidhjet infrastrukturore me jashtë, sidomos në infrastrukturën rrugore dhe hekurudhore. Indeksi i konektivitetit, tregon se vendi ynë ka lidhjet më dobëta rrugore më shtetet e tjera në raport me vendet e tjera të Rajonit ECA, por edhe renditjen më të dobët edhe në Rajon.
Sipas raportit, Shqipëria shfrytëzon për lidhjet me jashtë vetëm 35 për qind të potencialit të infrastrukturës rrugore dhe gjithashtu nuk e shfrytëzon aspak transportin me hekurudhë, i cili aktualisht realizon një pjesë të madhe të shkëmbimeve tregtare në Rajonin ECA.
Banka Botërorë sugjeron se përmirësimi i sistemit të transportit rrugor dhe hekurudhor është një faktorët kyç për maksimizimin e PBB-së në Rajonin e ECA-s.
Shfrytëzim më të mirë se Shqipëria kanë edhe vendet e Azisë Qendrore, të cilat shfrytëzojnë rreth 40 për qind të potencialit të tyre rrugor për tu lidhur me jashtë.
Edhe Kaukazi i Jugut dhe Turqia, shfrytëzon 50 për qind të potencialeve për tregtinë ndërkufitare.
Për Bankën Botërore vendet duhet të jenë strategjike në zgjedhjen e lidhjeve infrastrukturore me të tjerët sidomos në transportin rrugor.
Dallimet në potencialet e realizuara në rajonet e ECA janë më të mëdha për transportin hekurudhor. Shqipëria ndër vendet e Ballkanit Perëndimor nuk i shfrytëzon ende potencialet e saj të lidhjeve tregtare përmes hekurudhës. Evropa Lindore performon relativisht mirë me rrugët, por është shumë dobët për rrjetin hekurudhor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
