Edhe Shqipëria njeh Liderin e opozitës në Venezuelë, si Presidentin e përkohshëm të vendit. Pas vendimit që shpalli një natë më parë presidenti amerikan Donald Trump, shumë vende njohën Juan Guaidon dhe bënë thirrje për largimin e presidentit venezuelas Nicolas Maduro.
Nëpërmjet një postimi në “Twitter”, Kryeministri Edi Rama pohoi se Shqipëria e njeh Guaidón si kreun e shtetit të Venezuelës dhe i uron sukses në punën e tij.
“Shqipëria njeh Juan Guaidó si President të Përkohshëm të Venezuelës. Në emër të popullit të #Shqipërisë i uroj Guaidos dhe venezuelianëve të guximshëm që të kenë sukses në zhdukjen e paligjshmërisë që ka kthyer vendin në ferr për popullin”, shkruan Rama nw “Twitter”.
Venezuela është përfshirë nga protestat e kundërshtarëve dhe mbështetësve të Presidentit Nicolas Maduro. Protestat kundër qeverisë janë një provë vendimtare për Juan Guaidon, udhëheqësi i sapozgjedhur i Kongresit. Megjithatë, çdo ndryshim i regjimit varet nga besnikëria e forcave të armatosura, të cilat kanë mbështetur Maduron gjatë dy valëve të protestave në rrugë. Guaido, që po merr mbështetje ndërkombëtare i ka bërë thirrje ushtrisë të dënojë Maduron dhe ka premtuar amnisti për ata që e ndihmojnë për të punuar drejt rivendosjes së demokracisë në vend. Ai ka thënë se do të jetë i gatshëm të shërbejë si president i përkohshëm dhe të kërkojë zgjedhje të reja nëse Maduro detyrohet të largohet me ndihmën e ushtrisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.