.png)
Presidenti i Këshillit Europian Charles Michel akuzoi Shtetet e Bashkuara për “mungesë besnikërie” duke thënë se përjashtimi i Francës nga një marrëveshje për shitjen e nnëndetëseve shkon kundër çdo parimi të aleancës dy palëshe.
Ndërkohë që ndodhen në Nu Jork për të marrë pjesë në në Asamblenë e Përgjitshme të Kombeve të Bashkuara, ministrat e Bashkimit Europian po kërkojnë “sqarime” nga Uashingtoni për “të kuptuar më mirë se cilat janë synimet e SHBA pas shpalljes së partneritetit të tyre strategjik me Mbretërinë e Bashkuar dhe Australinë“.
“Parimet themelore midis aleatëve janë transparenca dhe besimi, ato shkojnë së bashku. Dhe këtu, çfarë shohim? Një mungesë e qartë e transparencës, e besimit”, tha Michel.
Ministrat e Jashtëm të unionit janë solidarizuar me Francën, për shkak të vendimit të Australisë që të heqë dorë nga marrëveshja për blerjen e nëndetëseve franceze, dhe të arrijë marrëveshje të re me Shtetet e Bashkuara dhe Britaninë.
Ky njoftim “ka qenë në kundërshtim me thirrjet për bashkëpunim më të madh me Bashkimin Europian në Indo-Paqësor”, ka thënë shefi për Politikë të Jashtme i Bashkimit Evropian, Josep Borrell më 20 shtator, pasi është takuar me ministrat e BE-së, në prag të takimeve në Asamblenë e Përgjitshme të Kombeve të Bashkuara në Nju Jork.
Ministri i Jashtëm francez, Jean-Yves Le Drian ka thënë se ka anuluar një takim në Nju Jork me homologun e tij australian, për shkak të “krizës së besimit” nga humbja e 40 miliardë dollarëve në kontratën për nëndetëse.
Ministri Le Drian ka thënë se nuk ka pasur takim të planifikuar me homologun e tij amerikan, Antony Blinken, mirëpo “mund ta takojë në korridore”.
Ai ka thënë në një konferencë për media se Francës i është fshehur marrëveshja e re për nëndetëse.
“Ne jemi aleatë, ne bisedojmë dhe nuk fshehim strategji të ndryshme. Për këtë ka krizë besimi dhe besnikërie”, ka thënë ai.
Javën e kaluar, Parisi ka marrë vendim të pashembullt, duke thirrur për konsultime ambasadorët që ka në Australi dhe Shtetet e Bashkuara. SHBA, Britania dhe Australia kanë thënë se marrëveshja e re forcon përkushtimin e tyre për rajonin e Indo-Paqësorit dhe kanë insistuar se kriza diplomatike nuk do të ndikojë në marrëdhëniet afatgjata me Francën.
Marrëveshja e arritur së fundmi nënkupton se Australia do të bëhet shteti i shtatë në botë që do të ketë nëndetëse me kapacitet bërthamor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
