Juventusi ka vendosur të vazhdojë edhe për një sezon me Mauricio Sarrin në stol. Situata ka ndryshuar dhe tashmë fushata e afrimeve në merkaton e verës do të varet nga udhëzimet e trajnerit toskan. Dhe ky është një lajm i mirë për kapitenin e Kombëtares, Elseid Hysaj, një nga të parapëlqyerit e Sarrit.
Një sezon torturues, i mbushur me kritika dhe me një dashuri që nuk lulëzoi kurrë me ambientin dhe tifozët bardhezinj, nuk do të mbyllet me largimin e trajnerit Sarri nga Juventusi, të paktën nëse bardhezinjtë do ta administrojnë mirë diferencën prej 8 pikësh në 6 javët e mbetura. Pista e Guardiolës mbyllet pas vendimit të KAS-it, që i ka hequr dënimin Mançester Sitit. Edhe kuotat e Simone Inzagit bien, duke parë mbylljen që Lacio po i bën sezonit. Në këtë pikë, duan apo nuk duan drejtuesit e Juventusit, do ta mbajnë Sarrin edhe një sezon, duke parë fitimin e titullit.
Një zgjedhje logjike, duke marrë në konsideratë faktin se Sarri është marrë për një projekt teknik afatgjatë. Por te Juventusi, nëse nuk fiton, pavarësisht projektit, shkon në shtëpi. Edhe perspektiva e merkatos bardhezi shtyn drejt konfirmimit të Sarrit. Ardhja e Arturit, këmbëngulja për Zhorzhinjon për të bërë lidhësin mes mbrojtjes dhe mesfushës, kërkesat për Xaniolon si sulmues krahu dhe Milik si pasues i Higuain, janë tregues të qartë për të ardhmen si bardhezi të trajnerit aktual.
Me lojtarët adaptë të futbollit të tij, Sarri nuk do të ketë alibi, edhe pse është i detyruar të administrojë anarshinë taktike të Dibalës dhe Kristiano Ronaldos. Me konfirmimin e Sarrit hapet një dritare edhe për Elseid Hysajn, mbrojtësin dhe kapitenin e Kombëtares. Shkodrani pritet të largohet nga Napoli dhe nuk është aspak çudi që Sarri të kërkojë në skuadër sezonin e ri, ndoshta edhe si alternativë në stol.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.