Rudi Erebara: të zhgënjyer nga deputetët e PD, të na bashkoheshin në protestën te Parlamenti

Protesta kundër shembjes së godinës së Teatrit Kombëtar ka vijuar edhe pas miratimit të projektligjit në Parlament me 75 vota pro. Të mbledhur kësaj here në oborrin e teatrit, siç kanë bërë për thuajse dy muaj me radhë qytetarë dhe pak aktorë kanë thënë se do e vazhdojnë qëndresën, deri edhe në përshkallëzim të saj.

Shkrimtari Rudi Erebara, një figurë aktive kundër shembjes së godinës pasi ka përshëndetur gjestin e Pandeli Majkos ka thënë se ndihet i zhgënjyer nga deputetët e opozitës, të cilët sipas tij duhet t’u ishin bashkuar protestuesve përpara Parlamentit, pas mbylljes së seancës parlamentare të ditës së enjte, kur deputetët e mazhorancës i dhanë dritën jeshile projektligjit për shembjen e godinës së teatrit dhe hapjes së negociatave me kompaninë ndërtuese “Fusha shpk” që do të ndërtojë edhe godinën e re, siç është deklaruar me asnjë para nga buxheti i shtetit. Erebara në fjalën e tij e quajti çështjen e teatrit një çështje politike

Regjisorja Suela Bako dhe qytetarë pjesëmarrës në protestën kundër shembjes së godinës së TK.

“Siç e thashë edhe para 4 muajsh, në Ditën Ndërkombëtare të Teatrit, nuk ishte thjesht çështje aktorësh apo regjisorësh, është çështje e historisë dhe e Europës. Do të bëhej patjetër çështje politike dhe, falënderoj PD-në dhe Opozitën që zbatoi detyrën qytetare, e votoi ligjin kundra dhe na mbështeti aq sa na mbështeti si qytetarë. E ftoj Opozitën të vazhdojë misionin e të mbrojë historinë e këtij qyteti.”-tha shkrimtari laureat i çmimit Europian për Letërsinë, ndërsa nuk i kurseu edhe kritikat për deputetët e PD-së. “ Dje pritëm gjithë ditën e natën dhe mund të kishin ardhur të na bashkoheshin, të na jepnin dorën e të na kërkonin falje se nuk i kishin numrat për ta rrëzuar ligjin, por e bënë detyrën dhe janë bashkë me ne. Të mos e lënë më Shqipërinë në dorë të Edi Ramës dhe të Edi Ramave të tjerë.”Erebara tha se detyra e Opozitës është t’i bashkohete qytetarëve që nesër të meritojë votën e tyre dhe i bëri edhe njëherë thirrje kësaj të fundit të vazhdojë qëndresën.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.