.png)
Nga Gazeta 'SI' - Deri në nëntor të 2023-shit, në vend u regjistruan 69.493 mjete të reja duke shënuar kështu një numër rekord. Nga një vit më parë, janë blerë rreth 10 mijë mjete më shumë.
Pjesa më e madhe, 84% janë autovetura dhe 7% motora. Pjesa tjetër janë mjete transporti të mëdha.
Sipas të dhënave që jep Drejtoria e Shërbimeve Rrugore, DPSHTRR, ka një zhvendosje të trendit dhe shqiptarët po blejnë më shumë makina të reja dhe më të shtrenjta. Gjithsesi dominojnë përsëri mjetet +10-vjeçare. 11.3% e makinave të reja (rreth 7 mijë) janë të prodhuara 4 vitet e fundit. 10% (rreth 5 mijë) janë prodhuar 5-8 vitet e fundit, pra relativisht mjete të reja.
Vlera mesatare e regjistruar është mbi 1 mln lekë, 34% më e lartë se në 2018-n.
Në rritje vazhdon të jetë edhe tregu i mjeteve elektrike, ndonëse jo me shumë shpejtësi. Deri në nëntor 2023 ishin regjistruar 3.037 mjete elektrike.
“Regjistrimi i autoveturave euro 5 e sipër është rritur me 81 % krahasuar me janar-nëntor 2021, duke rritur regjistrimet e autoveturave eco-friendly e më pak ndotëse. 5.740 mjete me moshë mesatare 22-vjeçare janë çregjistruar plotësisht nga sistemi, 47 % më shumë krahasuar me 2021”, njofton DPSHTRR.
Mercedes-Benz ka rënë përfundimisht nga froni si firma e preferuar e shqiptarëve dhe është zëvendësuar me Volkswagen e cila mban vendin e parë rreth 25% e makinave të reja të blera këtë vit. Ndaj totalit vetëm 20% janë Benz. E treta në radhë qëndron Audi me 12.4%.
Nga një vit më parë vërehet një rritje e shpejtë e automjeteve që importohen nga Koreja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
