.png)
Gazeta Si – Humbje e rëndë për Bajern Mynih në fushën e tij, në javën e 18-të të Bundesligës. Bavarezët janë mundur 1-0 në ‘Allianz Arena’ nga Verder Bremen dhe tashmë e shohin veten 7 pikë prapa Bajer Leverkusen. Humbja e sotme mund të ketë kosto të lartë për titullin kampion në fund.
Zotërim steril topi dhe shumë gjeometri, pa finalizim për skuadrën e Tuhel, që u ndëshkua në pjesën e dytë nga e një e majtë e Veiser. Për fat të mirë, Bajerni ka edhe ndeshjen me Maincin për të luajtur dhe mund ta zbutë pak diferencën me kreun.
Pjesa e parë ishte argëtuese. Bajerni e mbylli kundërshtarin në zonën e rreptësisë, por nuk arriti të gjente goditjen për të çarë murin e Verderit. Miqtë gjithsesi ishin të rrezikshëm në kundërsulm, ku Nojer në disa raste ia doli ta mbante rrjetën të paprekur. Njimah shënoi për Verderin në një kundërsulm të rrufeshëm, por VAR e anuloi golin për një faull ndaj Musialas.
Pas pushimit gjërat ndryshuan dhe Verder goditi në minutën e 59-të me një aksion personal të Veiser, të mbyllur me një të majtë të fuqishme poshtë traversës. Tuhel hodhi menjëherë në fushë Goretzkën dhe Mylerin, duke e rritur peshën e sulmit. Megjithatë, pavarësisht rasteve të panumërta, asgjë nuk ndryshoi.
Verder Bremen mori 3 pikët dhe u ngjit në kuotën 20, në vend të 12-të. Bajerni mbetet në kuotën e 41 pikëve, 7 më pak se Leverkuseni dhe me një ndeshje më pak.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
