Partia Demokratike ka reaguar në lidhje me rivotimin urgjent të ndryshimeve të Kodit Zgjedhor në Kuvend.
Sekretari i Përgjithshëm, Gazmend Bardhi, është shprehur se Shqipëria sot është më pak demokratike, teksa e ka krahasuar kryeministrin Rama me presidentin bjellorus Lukashenko.
“Me rrëzimin e dekretit të presidentit, duke refuzuar thirrjen e Bashkimit Europian për të pritur opinionin e Komisionit të Venecias për Kodin e njëanshëm Zgjedhor, Shqipëria sot është më pak demokratike dhe më pak europiane. Qeveria e Edi Ramës është identifikuar në Bruksel dhe kryeqytetet kryesore europiane si një qeveri që punon kundër integrimit europian dhe kundër interesit të qytetarëve. Me refuzimin që i bëri thirrjeve të përsëritura të BE, Rama nuk ndryshon nga Lukashenko”, shprehet Bardhi.
Ndër të tjera, ai thotë se “Për pushtetin e tij personal është gati ti vërë zjarrin Shqipërisë, t’i ndëshkojë shqiptarët duke penguar me dashje hapjen e anëtarësimit të vendit në BE. Injorimi i thirrjes së BE për opinionin e Komisionit të Venecias, e izolon tërësisht Shqipërinë dhe e fut në hartën e vendeve që janë në kurs përplasje me Europën. Kjo është përgjegjësi e një njeriu që pushtetin e tij personal e vendos mbi interesin e Shqipërisë dhe shqiptarëve”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.