Kanë kaluar pak më shumë se dy muaj nga fitorja e Bayern, dhe tashmë rikthehet Champions, trofeu në dëshirën dhe mendjen e 32 skuadrave që, duke filluar nga mbrëmja e sotme, do ti japin start fazës së grupeve. Jo të gjitha skuadrat kanë kualitetin për ta ëndërruar, por kur luhet një kompeticion kaq i rëndësishëm, është e drejtë që ti lesh mënjanë racionalitetet e parashikimet.
Që këtë mbrëmje janë të shumta motivet që e bëjnë këtë natë startuese emocionuese. Sfida mes debutuesit, në pankinë, Pirlo, e njeriut që e zbuloi, në fushë, 25 vjet më parë. Dinamo Kiev-Juventus: Lucescu kundër të shkuarës së tij e një të tashme që sheh nxënësin e tij të çojë përpara idenë për futbollin ofensiv edhe në një fushë të vështirë si ajo ukrainase. Por kjo është edhe nata e sfidës mes Këpucës së Artë në fuqi, Immobile, e bomberit të muajve të fundit, Haaland, reklama më e mirë për sfidën Lazio-Borussia Dortmund.
Duhet kuptuar edhe vlera reale e Barcelonës së Koeman, në Camp Nou kundër Ferencvaros të Rebrov, nxënësi i kolonelit legjendar Lobanovski, e Leipzig të Nagelsmann, zbulimi i edicionit të kaluar e kryesues aktual në Bundesliga, i impenjuar në shtëpi kundër turqve të Basaksehir, edhe pse sfida më interesante është ajo mes finalistëve të dy muajve më parë, Psg, e Manchester United.
Mbrëmja e të mërkurës nuk është më pak joshëse. Bayern Mynich -Atletico Madrid i ngjan një finale të parakohshme, ashtu si nxit kuriozitet debutimi në Europë (në këtë rast ndaj Shakhtar) i një Real Madrid ende në kërkim të identitetit në këtë fillim sezoni. Nesër e ka radhën edhe Inter, në San Siro kundër Borussia Mönchengladbach, në një ndeshje për tu fituar absolutisht, për tu vënë në pozitat komode për avancuar në 1/8. Për tu ndjekur edhe Manchester City-Porto e Ajax-Liverpool, një klasike e futbollit botëror, që luhet në grupin ku Atalanta do të jetë e impenjuar në Danimarkë kundër Midtjylland. Për bergamaskët është rasti i artë për ti treguar Europës se kanë kaluar nga një zbulim në një skuadër me besueshmëri kontinentale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.