Gazeta Si - Katër persona janë arrestuar në vijim të operacionit anti-drogë ‘Restart’ në Korçë, ndërsa janë sekuestruar 72 kilogramë kanabis.
Policia thotë se në pranga kanë rënë, vëllezërit Klaudio Sino, 35-vjeç, dhe Bardhi Sino, 38 vjeç, Blerim Karameta, 26 vjeç, banues në Miras Devoll, dhe Igli Cangëtari, 30 vjeç, banues në Çetë, Devoll.
Katër të arrestuarit që dyshohet se do të transportonin një sasi droge, u ndaluan dhe kontrolluan nga policia në mjetin tip "Mercedes-Benz", në afërsi të hyrjes së fshatit Miras, Devoll, me drejtues shtetasin Klaudio Sinën.
Gjatë kontrollit, u gjetën e sekuestruan në cilësinë e provës materiale 65 pako, me peshë totale 69 kg lëndë e dyshuar narkotike kanabis.
Gjithashtu, gjatë kontrollit në banesën e 35-vjeçarit, iu gjetën e sekuestruan edhe 3 kg të tjera lëndë e dyshuar narkotike kanabis dhe një sasi municioni luftarak.
Nga veprimet e mëtejshme hetimore, rezultoi se bashkëpunëtorë në këtë aktivitet kriminal, janë edhe shtetasit Bardhi Sino, Blerim Karameta, dhe Igli Cangëtari.
Kjo është faza e gjashtë e operacionit policor të koduar "Restart", i nisur pesë muaj më parë.
Kështu, ka shkuar në 16 numri i të ndaluarve, si dhe është sekuestruar 445, 5 kilogramë lëndë narkotike kanabi nga këtij grupi kriminal në fushën e trafikimit të lëndëve narkotike në drejtim të Greqisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.