Reshjet e ditës së djeshme(17 shtator) përmirësuan situatën hidrike në liqenin e Fierzës që shërben si rregullator edhe për dy hidrocentralet e mëdhenj mbi kaskadën e Drinit, të Vaut të Dejës dhe të Komanit.
Sipas të dhënave për datën 17 shtator nga Korporata Elektroenergjitike Shqiptare(KESH) niveli i ujit në liqenin e Fierzës u rrit me 1 metër, në 268 metra mbi nivelin e detit ndërsa prurjet mes ditës së djeshme dhe asaj të sotshme pritet të jenë mes 700-1000 m3/s.
Pika optimale në liqen është 271 metër, minimale 244 metra ndërsa ajo maksimale kur ka reshje të bollshme shkon në 296 metra.
Në hidrocentralin e Komanit kuota dje ka shkuar në 167m ndërsa në Vaun e Dejës 72m.
KESH njoftoi se nga data 11 shtator ishte ndërprerë prodhimi i energjisë elektrike nga HEC-i i Fierzës me qëllim përpunimin e prurjeve anësore në Koman dhe Vau Dejës si dhe krijimin e një rezerve hidrike në Fierzë.
Administratori i KESH, Ergys Verdhi në një intervistë për televizionin Euronews tha se nga parashikimet e sistemit të meteorologjisë,parashikohet se katërmujori i ardhshëm do të jetë i lagësht, gjë që do përmirësojë situatën.
Problematika që ekziston momentalisht sipas tij është që sasia e prodhimit që ne prodhojmë,rreth 24 giga në ditë , mos të tejkalohet me ardhjen e temperaturave të ulëta.
Ndaj, shtoi ai, apeli është që të kursejmë energji në mënyrë që të mos i kalojmë këto 24 giga dhe të prodhojmë me anë të rezervës tonë .
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.